येवला येथे शनिवारी भाजप आणि भाजयुमोचा संयुक्त स्नेहमेळावा झाला. दिवाळीच्या स्नेहपर्वाचे औचित्य साधून झालेल्या या मेळाव्यात आगामी स्थानिक निवडणुकांच्या पार्श्वभूमीवर ग्रामीण भागात संघटनात्मक बांधणीला गती देण्याचे आवाहन करण्यात आले. जिल्हा परिषद, पंचायत समिती आणि ग्रामपंचायत निवडणुका डोळ्यासमोर ठेवून पक्षाची ताकद उभी करण्याचा निर्धार यावेळी व्यक्त करण्यात आला.
तरुण नेतृत्वाला संधी देण्याचा निर्धार
पालकमंत्री गिरीश महाजन यांच्या नेतृत्वाखाली या निवडणुका सक्षमपणे लढविण्याचा आणि नव्या तसेच तरुण नेतृत्वाला संधी देण्याचा निर्धार मेळाव्यात करण्यात आला. भाजयुमोचे जिल्हाध्यक्ष तथा नगरसेवक समीर समदडिया यांच्या पुढाकारातून वर्मा पॅलेस येथे हा मेळावा झाला. भाजपचे जिल्हाध्यक्ष यतीन कदम प्रमुख उपस्थित होते.
मेळाव्यात ज्येष्ठ नेते धनंजय कुलकर्णी, नानासाहेब लहरे, रमेश भावसार, अॅड. शैलेश भावसार, राजेंद्र परदेशी आणि माजी नगराध्यक्ष बंडू क्षीरसागर यांनी मार्गदर्शन केले. गणेश दोडे यांच्यासह विविध पदाधिकारी व कार्यकर्त्यांनी आपापल्या अडचणी मांडतानाच शहर व परिसरातील जनहिताचे प्रश्न उपस्थित केले.
विकासकामांचा वेग आणि निधी
जिल्हाध्यक्ष यतीन कदम यांनी मार्गदर्शन करताना सांगितले की, मुख्यमंत्री देवेंद्र फडणवीस यांच्या नेतृत्वाखाली राज्यात विकासाची प्रक्रिया वेगाने सुरू आहे. येवला हे पूर्वीपासून संघटनात्मक आणि वैचारिकदृष्ट्या भाजपला अनुकूल असलेले गाव म्हणून ओळखले जाते. त्यामुळे आगामी निवडणुकांमध्ये पक्षाची ताकद पुन्हा एकदा पूर्ण क्षमतेने उभी करण्याचा निर्धार व्यक्त करण्यात आला.
पालकमंत्री गिरीश महाजन यांच्या माध्यमातून येवला मतदारसंघासाठी कोट्यवधी रुपयांचा निधी उपलब्ध होत असल्याचे समीर समदडिया यांनी सांगितले. केंद्र व राज्यात भाजप जनहिताची कामे करत असून शासनाच्या माध्यमातून होणाऱ्या विकासकामांचा लाभ सर्वसामान्यांपर्यंत पोहोचविण्यासाठी पक्षाच्या पदाधिकारी व कार्यकर्त्यांनी सक्रिय भूमिका बजावून संघटन वाढविण्याचा निर्धार मेळाव्यात झाला.
समीर समदडिया यांनी प्रास्ताविक केले. दत्ता सानप यांनी सूत्रसंचालन केले, तर प्रा. नानासाहेब लहरे यांनी आभार मानले. उपनगराध्यक्ष पुष्पा गायकवाड, नगरसेविका छाया क्षीरसागर, लक्ष्मी साबळे, जिल्हा उपाध्यक्ष गोविंद कुशारे, धीरज परदेशी, मयूर कायस्थ, संतोष नागपुरे, संतोष केंद्रे, बापूसाहेब गाडेकर, युवराज पाटोळे, गणेश गायकवाड, डॉ. नंदकुमार शिंदे, डॉ. गोविंदराव भोरकडे, संजय कुक्कर, संजय परदेशी, कृष्णा कव्हात, बाळासाहेब कुऱ्हे, मनीषा चव्हाण, ज्योती कपुरे, रत्ना गवळी आणि अनुराधा भायभंग आदी उपस्थित होते.
Leave a Reply