लातूर शहरात १६ नोव्हेंबरपासून ६५ वी महाराष्ट्र राज्य हौशी मराठी नाट्य स्पर्धा रंगणार आहे. हौशी नाट्य कलावंतांना व्यासपीठ देणाऱ्या या स्पर्धेत यंदा चार नव्या दिग्दर्शिका आपल्या कलाकृतींसह रंगभूमीवर पदार्पण करत आहेत. दिग्दर्शक म्हणून त्यांचे हे पहिलेच पाऊल असून त्यांच्या नाटकांबाबत नाट्य वर्तुळात उत्सुकतेचे वातावरण आहे.
स्पर्धेचे स्वरूप आणि आयोजन
राज्य सरकारच्या सांस्कृतिक कार्य संचालनालयातर्फे ही स्पर्धा घेतली जाते. दोन वर्षांपूर्वी लातूर येथे या स्पर्धेचे स्वतंत्र केंद्र मंजूर झाले. यंदा लातुरातील स्वतंत्र केंद्रावर भरणाऱ्या स्पर्धेचे तिसरे वर्ष आहे. दगडोजी देशमुख सभागृहात स्पर्धा होणार असून १५ नाटकांनी त्यात सहभाग घेतला आहे. या नाटकांचा दररोज एक प्रयोग सादर होणार आहे. विशेष म्हणजे यंदा प्रथमच चार दिग्दर्शिका स्पर्धेत सहभागी झाल्या आहेत.
चार दिग्दर्शिका आणि त्यांची नाटके
उन्नती फाउंडेशनच्या माध्यमातून सुवर्णा बुरांडे या डॉ. समीर मोने लिखित ‘लाडू’ हे नाटक सादर करणार आहेत. हे नाटक पुरुष पात्रविरहित असून स्पर्धेतील हा एक वेगळा विक्रम ठरणार आहे. सुमती सोमवंशी यांनी रवींद्र वाडकर लिखित ‘आणि हे शहर सुद्धा’ या नाटकाचे दिग्दर्शन केले आहे. माजी विद्यार्थी संघ, दयानंद महाविद्यालय या नाट्य संघामार्फत हे नाटक सादर होणार आहे.
उदगीरच्या कल्पवृक्ष सांस्कृतिक शैक्षणिक सेवाभावी संस्थेमार्फत अतुल साळवे लिखित ‘मृत्यू आधीच झाला होता’ हे नाटक सादर होत आहे. या नाटकाच्या दिग्दर्शिका करुणा विचारे आहेत. प्रसाद दाणी लिखित ‘नथिंग टू से’ हे नाटक लातूरची अनुभव सेवाभावी संस्था सादर करणार असून सिद्धी गोजमगुंडे यांनी त्याचे दिग्दर्शन केले आहे. या नाटकातील मध्यवर्ती भूमिकाही त्यांनी साकारली आहे.
Leave a Reply