राज्याच्या राजकीय वर्तुळात सध्या राष्ट्रवादीच्या विलीनीकरणाची जोरदार चर्चा सुरू आहे. या चर्चांवरून राष्ट्रवादीतच दोन गट पडल्याचंही बोललं जात आहे. अशात संजय राऊत यांनी राष्ट्रवादीचं विलीनीकरण ही दंतकथा असून शरद पवार सत्तेत जाणार नाहीत, असा दावा केला. त्यांच्या या विधानावर भाजप नेते प्रविण दरेकर यांनी जोरदार टीका केली आहे.
राऊतांच्या दाव्यावर दरेकरांचा पलटवार
दरेकर म्हणाले की, संजय राऊत सांगतात की राष्ट्रवादीच्या विलीनीकरणाचा विषय दोन दिवसांत संपेल. पण शरद पवार आणि सुनेत्रा पवार जोपर्यंत आपली भूमिका स्पष्ट करत नाहीत, तोपर्यंत हा विषय मार्गी लागणार नाही. महाविकास आघाडीत याबाबत विसंवाद असल्याचंही दरेकर म्हणाले. संजय राऊत म्हणतात की शरद पवार सत्तेत जाणार नाहीत, तर पृथ्वीराज चव्हाण वेगळी भूमिका मांडतात. त्यांच्याच बोलण्यात तफावत असल्याचा टोला दरेकर यांनी लगावला. शरद पवार हे अभ्यासू आणि धोरणी राजकारणी असल्याचंही दरेकर म्हणाले. माध्यमांमध्ये दोन राष्ट्रवादी काँग्रेसची चर्चा सुरू आहे. मात्र त्या-त्या पक्षाचे प्रमुख भूमिका घेत नाहीत, तोपर्यंत या केवळ चर्चाच असल्याचं दरेकर यांनी नमूद केलं.
रोहित पवारांवर निशाणा आणि छठपूजेवरून टोला
दरेकर यांनी रोहित पवार यांच्यावरही निशाणा साधला. रोहित पवार यांनी ‘मफलर मॅन’बाबत सगळ्यात आधी विधान केलं होतं. जो विषय संपला आहे, त्याबाबत चर्चा घडवून कुणाला काय मिळेल, हे वेगळं सांगायची गरज नाही, असं दरेकर म्हणाले. रोहित पवार यांच्याकडून अजित पवार यांच्या मृत्यूचा विषय धगधगत ठेवून राजकारण सुरू असल्याचा आरोप त्यांनी केला. अजित पवार यांच्या घातपाताच्या संदर्भात अनेक संस्था काम करत आहेत, मात्र रोहित पवार त्याचं भांडवल करत असल्याची टीका दरेकर यांनी केली. दुसरीकडे, मनसे अध्यक्ष राज ठाकरे यांनी छठपूजेला मुंबईच्या रेल्वे स्थानकांवर भोजपुरी गाणी वाजल्याच्या प्रकरणावरून भाजपवर हल्लाबोल केला होता. त्यावरही दरेकर यांनी राज ठाकरेंना टोला लगावला. राज्याचे लोक कशातच अडकत नाहीत, ते देशप्रेमी आहेत, असं दरेकर म्हणाले. मनसेची नगरसेविका छठपूजेचे बॅनर लावते, पण राज ठाकरे आवाहन करतात, त्याला अर्थ प्राप्त होत नाही, असं ते म्हणाले. छठपूजा ही उत्तर प्रदेशची परंपरा आहे. ती जपण्याचा प्रयत्न होत असेल तर त्यात गैर काय, असा सवाल दरेकर यांनी उपस्थित केला.
Leave a Reply