दक्ष इलेव्हनने पटकावला शिवनेर चषक

जुन्नर येथे झालेल्या क्रिकेट सामन्यांमध्ये मुरबाड येथील दक्ष इलेव्हन गोरसई बी या संघाने यंदाच्या वर्षीचा शिवनेर चषक पटकावला आहे. येथील शंकरराव बुट्टे पाटील विद्यालयाच्या मैदानावर दिवाळीच्या सुट्ट्यांच्या निमित्ताने चार दिवसीय क्रिकेट सामने झाले. या सामन्यांचे वैशिष्ट्य म्हणजे सर्व सामने दिवस-रात्र खेळवले गेले.

२६ वर्षांची परंपरा

शहरातील शिवनेर क्रिकेट क्लबच्या वतीने गेल्या २६ वर्षांपासून दिवाळीच्या सुट्ट्यांमध्ये विद्यालयाच्या मैदानावर क्रिकेटचे सामने भरवले जातात. गतवर्षी तालुक्यात पहिल्यांदाच दिवस-रात्र सामन्यांचे आयोजन करण्यात आले होते. या स्पर्धांना क्रिकेट शौकिनांचा उत्स्फूर्त प्रतिसाद मिळाल्याने यंदाच्या वर्षीही दिवस-रात्र सामने आयोजित करण्यात आले होते. दररोज दुपारी तीन ते रात्री बारा या कालावधीत सामने झाले. या स्पर्धेत एकूण ३२ संघ सहभागी झाले होते. शिवनेर क्रिकेट क्लबचे ॲड. प्रवीण वाघमारे, विकास वाघमारे, सतीश लोखंडे, सुनील बढे, सचिन जाधव, प्रमोद बोऱ्हाडे, अजय खोत आणि रोहित भालेराव यांनी या स्पर्धांचे नियोजन केले.

विजेते संघ

स्पर्धेतील विजेते संघ पुढीलप्रमाणे आहेत. प्रथम क्रमांकावर दक्ष इलेव्हन गोरसई बी संघ (मुरबाड), दुसऱ्या क्रमांकावर मेजर गोरख शिवगिरी इलेव्हन संघ (संगमनेर), तिसऱ्या क्रमांकावर ओम साई इलेव्हन पै. नितीनतात्या वाडेकर व कैलासभाऊ निखाडे स्पोर्ट्स फाउंडेशन (खेड) आणि चौथ्या क्रमांकावर टाकळी ढोकेश्वर इलेव्हन (पारनेर) हे संघ राहिले.