जळगाव जिल्ह्यातील जामनेर येथील लॉर्ड गणेशा इंग्लिश मीडियम स्कूलमध्ये दुसरीत शिकणाऱ्या कृष्णा सागर गोसावी याने वयाच्या अवघ्या सातव्या वर्षी स्केटिंगमध्ये विश्वविक्रम नोंदवला आहे. त्याच्या या कामगिरीमुळे जिल्ह्याचा लौकिक वाढला आहे. कर्नाटकातील बेळगाव येथे एच्युव बाय शिवगंगा आरएसी इंडिया संस्थेने आयोजित केलेल्या ७२ तासांच्या विशेष उपक्रमात कृष्णाने ही नेत्रदीपक कामगिरी बजावली.
१७.९३ सेकंदांत १०० मीटर
कृष्णाने इनलाइन स्केट्सवर उलट्या दिशेने धावत १०० मीटरचे अंतर केवळ १७.९३ सेकंदांत पार केले. उलट्या दिशेने धावणे हे स्केटिंगमधील अत्यंत अवघड कौशल्य मानले जाते. त्याच्या या अनोख्या कौशल्याची जागतिक विक्रम म्हणून अधिकृत नोंद करण्यात आली आहे. या ऐतिहासिक यशामागे प्रशिक्षक आनंद मोरे यांचे मोलाचे मार्गदर्शन लाभले असून, कृष्णाच्या या कामगिरीचे सर्वत्र कौतुक होत आहे.
इतक्या लहान वयात जागतिक पातळीवर विक्रम नोंदवणे ही दुर्मीळ कामगिरी आहे. कृष्णाच्या यशामुळे जामनेरसह संपूर्ण जळगाव जिल्ह्यात आनंदाचे वातावरण आहे. त्याच्या शाळेतील शिक्षक, सहकारी विद्यार्थी आणि परिसरातील नागरिकांनी त्याचे अभिनंदन केले आहे.
Leave a Reply