जळगाव येथील कवयित्री बहिणाबाई चौधरी उत्तर महाराष्ट्र विद्यापीठात सुरू झालेल्या आंतर महाविद्यालयीन युवक महोत्सव युवारंग २०२६ आणि दिव्यांग कला महोत्सवाच्या पहिल्या दिवशी विद्यार्थ्यांनी उत्कृष्ट सादरीकरण केले. पाश्चिमात्य समूहगान, भारतीय शास्त्रीय नृत्य आणि शास्त्रीय संगीताच्या स्पर्धांतून भारतीय संस्कृतीचे दर्शन घडले. मूकनाट्य, वक्तृत्व, स्थळचित्रे आणि व्यंगचित्रांच्या माध्यमातून विद्यार्थ्यांनी कलात्मकता आणि सर्जनशीलता दाखवली.
महोत्सवाच्या उद्घाटनानंतर विविध सांस्कृतिक स्पर्धांना सुरुवात झाली. यात (कै.) वाय. एस. महाजन मुलींची वक्तृत्व स्पर्धा, (कै.) ग. वी. अभ्यंकर मराठी नाट्यगीत स्पर्धा, (कै.) शांताबाई अभ्यंकर मराठी भावगीत गायन स्पर्धा आणि कबचौ उमवि बहिणाबाई करंडक आंतर महाविद्यालयीन एकांकी स्पर्धा झाल्या.
पाच रंगमंचांवर विविध स्पर्धा
महात्मा फुले सभागृहात पाश्चिमात्य समूहगान आणि भारतीय शास्त्रीय नृत्याच्या स्पर्धेत १४ संघ सहभागी झाले. डॉ. बाबासाहेब आंबेडकर सभागृहात भारतीय शास्त्रीय संगीतात स्वरवाद्य आणि तालवाद्यात विद्यार्थ्यांनी सुरेल सादरीकरण केले. शाहीर अण्णा भाऊ साठे सभागृहात झालेल्या मूकनाट्य स्पर्धेत विद्यार्थ्यांनी हावभाव आणि देहबोलीतून महिला अत्याचार, मानसिक ताणतणाव आणि मद्यपान करून वाहन चालवणे यांसारख्या सामाजिक विषयांची प्रभावी मांडणी केली.
संत रविदास सभागृहात वक्तृत्व स्पर्धेत महात्मा फुले आणि डॉ. बाबासाहेब आंबेडकर यांच्या स्वप्नातील भारत या विषयावर ६२ विद्यार्थ्यांनी मांडणी केली. संत गाडगेबाबा सभागृहात स्थळचित्र स्पर्धेत विद्यार्थ्यांनी कुंचल्यातून दृश्ये साकारली, तर व्यंगचित्र स्पर्धेत विविध सामाजिक विषयांवर कल्पकता व्यक्त केली. या स्पर्धेत ४९ विद्यार्थ्यांनी सहभाग घेतला.
पुढील सादरीकरणे
युवारंग महोत्सवात भारतीय लोकसंगीत वाद्यवृंद, भारतीय समूहगान, भारतीय शास्त्रीय गायन, पाश्चिमात्य वाद्यसंगीत, पाश्चिमात्य गायन (एकल), प्रहसन, मिमिक्री, वादविवाद स्पर्धा, चिकट कला, माती कला आणि स्थळ छायाचित्र यांचे सादरीकरण होणार आहे.
स्रोत: मूळ बातमी
Leave a Reply