दिवाळी सणानिमित्त आपल्या गावी परतणाऱ्या चाकरमान्यांसाठी एसटी महामंडळाच्या बीड विभागाने मोठी सोय केली आहे. पुणे, मुंबईसारख्या मोठ्या शहरांतून बीडमध्ये परतणाऱ्या प्रवाशांची गर्दी लक्षात घेऊन लांब पल्ल्याच्या ३६ जादा फेऱ्यांचे वेळापत्रक जाहीर करण्यात आले आहे. प्रवाशांचा प्रवास सुखकर आणि वेळेवर व्हावा, हा यामागचा उद्देश आहे.
जाहीर नियोजनानुसार पुणे, मुंबई, कल्याण, धुळे, संभाजीनगर, अमरावती, सोलापूर, नाशिक, लातूर, बारामती, त्र्यंबकेश्वर आणि आदमापूर या प्रमुख मार्गांवर विशेष जादा बसेस सोडण्यात येणार आहेत. याशिवाय छत्रपती संभाजीनगर, नांदेड, परभणी आणि जालना या मराठवाड्यातील मार्गांवरही डझनभर जादा फेऱ्यांचे नियोजन आहे. महिलांना मिळणारी ५० टक्के सवलत आणि ज्येष्ठ नागरिक व विद्यार्थ्यांसाठी असलेल्या विविध शासकीय सवलतींमुळे सणासुदीच्या काळात एसटी बस प्रवाशांसाठी हक्काचे आणि सुरक्षित साधन ठरते. अतिरिक्त गर्दी टाळण्यासाठी प्रवाशांनी आगाऊ आरक्षण करावे, असे आवाहन करण्यात आले आहे.
प्रमुख आगारांचे वेळापत्रक
बीड आगारातून बीड ते धुळे, बीड ते स्वारगेट (पुणे), बीड ते कल्याण, बीड ते बारामती आणि बीड ते त्र्यंबकेश्वर या फेऱ्या जाहीर झाल्या आहेत. धारूर आगारातून पुणे, आदमापूर आणि मेहकर, माजलगाव आगारातून पुणे आणि सोलापूर, गेवराई आगारातून पुणे, अमरावती आणि सोलापूर, पाटोदा आगारातून पुणे, आष्टी आगारातून जळगाव आणि मुंबई, तर अंबाजोगाई आगारातून रिसोड आणि पुणे या मार्गांवर जादा बसेस धावणार आहेत. प्रत्येक मार्गाचे जाता-येता वेळापत्रक स्वतंत्रपणे जाहीर करण्यात आले आहे.
खासगी ट्रॅव्हल्सवर १४ दिवसांची तपासणी मोहीम
दिवाळीच्या हंगामात खासगी ट्रॅव्हल्सकडून अवाजवी भाडेवाढ होऊ नये, यासाठी प्रादेशिक परिवहन विभागाने १४ दिवसांची विशेष तपासणी मोहीम हाती घेतली आहे. ही कारवाई केवळ कागदोपत्री मर्यादित न राहता थेट रस्त्यावर गाड्या थांबवून त्यांची कसून तपासणी केली जात आहे. क्षमतेपेक्षा जास्त प्रवासी भरणाऱ्या आणि जादा भाडे आकारणाऱ्या वाहनांवर कायदेशीर कारवाई केली जात आहे. विनापरवाना चालणाऱ्या गाड्या, अवाजवी भाडे आकारणारे आणि सुरक्षिततेचे नियम डावलणाऱ्या वाहनांवर दंडात्मक कारवाई होणार असून प्रवाशांच्या सुरक्षेशी कोणतीही तडजोड केली जाणार नाही, असे प्रशासनाने स्पष्ट केले आहे.
स्रोत: मूळ बातमी
Leave a Reply