दिवाळीसाठी लातूरच्या दिव्यांग बांधवांचे आयुर्वेदिक उटणे

लातूर येथे दिवाळीच्या निमित्ताने उटणे तयार करण्यात स्वाधार केंद्रातील तरुणाई रमली आहे. बुधोडा येथील ग्रामीण श्रमिक प्रतिष्ठान संचालित स्वाधार केंद्रातील दिव्यांग बांधव नैसर्गिक वनौषधींपासून आयुर्वेदिक उटणे तयार करत आहेत. उटणे तयार झाल्यानंतर त्याची आकर्षक पॅकिंग करून ते बाजारात विक्रीसाठी आणले जात आहे. या उपक्रमातून दिव्यांगांच्या कौशल्याला बाजारपेठ मिळण्यासोबतच रोजगार आणि आर्थिक आधारही मिळत आहे.

कोणत्या नैसर्गिक घटकांपासून उटणे

गुलाबाच्या पाकळ्या, तुळस, संत्र्याची साल, नागरमोथा, हळद, कपूर कचरी, चंदन, आंबेहळद आणि वाळा अशा नैसर्गिक घटकांपासून हे उटणे बनवले जाते. दिवाळीच्या अभ्यंग स्नानासाठी हे आयुर्वेदिक उटणे तयार केले जात असून ते उच्च गुणवत्तेसाठी ओळखले जाते.

बारा हजार पाकिटांचे उद्दिष्ट

केंद्राने यंदा बारा हजार उटणे पाकिटे तयार करण्याचे उद्दिष्ट ठेवले असून, आतापर्यंत प्रत्येकी ५० ग्रॅम वजनाची सात हजार पाकिटे तयार केली आहेत. मागील वर्षी लातूरमधील विविध शाळा, महाविद्यालये आणि सरकारी कार्यालयांसह विविध ठिकाणी स्टॉल लावून दिव्यांगांनी पाच हजार पाकिटांची विक्री केली होती. दुष्काळामुळे संस्थेला पाणीटंचाईचा सामना करावा लागत असून, उटणे विक्रीतून उभा राहणारा निधी पाणीपुरवठ्याच्या व्यवस्थेसाठी वापरण्यात येणार आहे. त्यामुळे अधिकाधिक नागरिकांनी उटणे खरेदी करून दिव्यांगांच्या श्रमाला प्रोत्साहन द्यावे, असे आवाहन संस्थेने केले आहे. प्रतिष्ठानचे कार्यकारी विश्वस्त प्रशांत सुडे यांनी सांगितले की, स्वाधार केंद्र गेल्या चार दशकांपासून ग्रामीण भागातील दिव्यांग व्यक्तींना व्यवसाय प्रशिक्षण देऊन त्यांच्या पुनर्वसनाचे कार्य करत आहे.

स्रोत: मूळ बातमी