दिवाळीत फुलांच्या दरात वाढ; दादर फूल मार्केटमध्ये गर्दी

दिवाळीनिमित्त मुंबईतील दादर फूल मार्केट आणि इतर बाजारपेठांमध्ये फुलांसह सणाच्या खरेदीसाठी रविवारी मुंबईकरांची तुफान गर्दी उसळली. दादर पश्चिम येथील फूल बाजार, रानडे रोड तसेच हिंदमाता परिसरामध्ये खरेदीसाठी नागरिकांची मोठी गर्दी दिवसभर पाहायला मिळाली. लक्ष्मीपूजन आणि नरक चतुर्दशी एकाच दिवशी असल्याने शनिवारी आणि रविवारी दादर फूल मार्केट फुलून गेले होते.

भाव वाढले तरी उत्साह कायम

सांगली, सातारा, जुन्नर, कर्नाटक, नाशिक, बंगळूर आणि कोल्हापूर या शहरांतून मुंबईच्या दादर आणि फूल मंडईत फुलांचा पुरवठा केला जातो. फुलांच्या खरेदीमध्ये झेंडू, गुलाब, शेवंती आणि विविध सजावटीच्या फुलांची मागणी सध्या वाढली आहे. मुसळधार पावसामुळे आवक कमी झाल्याने मुंबई आणि पुण्यासारख्या शहरांत झेंडूचे दर ८० ते १२० रुपये प्रति किलो आहेत. चांगल्या प्रतीच्या शेवंतीला १५० ते २०० रुपये प्रति किलो भाव मिळत आहे.

सणात सजावटीसाठी आणि हारांसाठी निशिगंधांच्या फुलांना मोठी मागणी असल्याने याचे दर २५० ते ३०० रुपये प्रति किलोवर गेले आहेत. तसेच आवक कमी राहिल्याने मोगऱ्याने १,००० रुपये प्रति किलोचा टप्पा पार केला आहे. दिवाळी, लक्ष्मीपूजन आणि पाडव्यानिमित्त घरे, दुकाने व कार्यालयांच्या सजावटीसाठी झेंडूच्या माळा आणि इतर फुलांची मागणी अचानक वाढली आहे.

फुलांचे भाव वधारल्याचा थेट परिणाम किरकोळ बाजारातील हारांच्या किमतींवरही झाला असून, लहान-मोठे हार दुप्पट किमतीत विकले जात आहेत. घराबाहेर लावण्यात येणाऱ्या झेंडूच्या तोरणालाही मोठी मागणी आहे. झेंडूच्या एक मीटरपर्यंतच्या तोरणाची किंमत ५० ते ६० रुपये आहे, तर दुहेरी झेंडू तोरणाची किंमत साधारणपणे १०० ते १२० रुपयांपर्यंत आहे.

शेतकऱ्यांचे मोठे नुकसान

दरम्यान, मीनाताई ठाकरे फूल मंडई या घाऊक फूल बाजारातही झुंबड उडाली आहे. झेंडू, गुलछडी, शेवंती, अस्टर या फुलांना सर्वाधिक मागणी आहे. दसऱ्यानंतर फुलांच्या मागणीत वाढ होते. पावसाळा, उन्हाळा आणि अवकाळी पावसामुळे शेतकऱ्यांचे खूप मोठे नुकसान झाले आहे. चांगल्या दर्जाचा माल खूप कमी मिळाला आहे. अवकाळी पावसामुळे फुलांवर नागाळी, करपा हे रोग पसरले आहेत. त्यामुळे ७० टक्के नुकसान झाल्याचे मंडईचे अध्यक्ष अविराज पवार यांनी सांगितले. लक्ष्मीपूजनानंतर पाडव्यासाठी फुलांना आणखी चांगली मागणी राहणार आहे.

झेंडूच्या फुलांचे भाव वाढले आहेत. त्यामुळे यंदा दिवाळीसाठी फुलांची खरेदी कमी प्रमाणात केली आहे. दरवाढीमुळे नेहमीपेक्षा कमी फुलांवर समाधान मानावे लागत आहे, असे ग्राहक अतुल यादव यांनी सांगितले. तर दिवाळीमुळे बाजारात फुलांना मागणी चांगली आहे. दसऱ्याच्या तुलनेत यंदा दिवाळीत चांगला भाव मिळत असल्याने विक्रेत्यांना दिलासा मिळाला आहे, असे फूलविक्रेता दीपक गुप्ता यांनी सांगितले.

स्रोत: मूळ बातमी