लक्ष्मीपूजनाच्या दिवशी भल्या पहाटे मंदिराकडे जाणे आणि दिव्यांच्या रोषणाईत सुरांचा आनंद घेणे, ही लातूरकरांची अनेक वर्षांची परंपरा आहे. यंदाही ही परंपरा अष्टविनायक मंदिरात मोठ्या संख्येने उपस्थित राहून पार पडली.
दहा हजार पणत्यांचा उजेड
या कार्यक्रमाचे आयोजन लातूर अर्बन को-ऑप बँक लिमिटेड आणि अष्टविनायक प्रतिष्ठान यांच्या वतीने करण्यात आले होते. मैफलीपूर्वी पहाटे साडेचार वाजता मंदिर परिसरात सुमारे दहा हजार पणत्या प्रज्वलित करण्यात आल्या. त्यामुळे श्रोत्यांना स्वरांसोबत दीपोत्सवाचाही आनंद घेता आला. यावेळी बँकेचे संस्थापक प्रदिप राठी, अध्यक्ष आकाश राठी यांच्यासह अन्य मान्यवर उपस्थित होते.
गायिकांच्या सुरांनी रंगलेली मैफल
यंदाची मैफल सायली टाक, शर्वरी डोंगरे आणि उन्नती मुंढे या गायिकांनी आपल्या स्वरांनी रंगवली. सुरुवातीला अहिर भैरव रागातील, प्रा. शशिकांत देशमुख यांनी तयार केलेली ‘कृष्ण कृष्ण हरी राधे श्याम’ ही रचना सादर करण्यात आली. त्यानंतर ‘अलबेला सजन आयो’ हे द्रुत तीन तालातील बंदीश गायले गेले. पुढे एकदंताय वक्रतुण्डाय, ओम नमो भगवते वासुदेवाय, राम राम जय राजाराम, वनमाली वासुदेव, गजानना गजानना, देवा श्री गणेशा, जय जय महाकाली, मेरे घर राम आये है, अच्युतम केशवम अशा विविध रचना सादर करण्यात आल्या.
या गायिकांना व्हायोलिन वादक पंकज शिरभाते (पुणे) आणि बासरीवादक चिरंजीव जयेश कुलकर्णी (सोलापूर) यांनी साथ केली. पहाटे साडेचार ते सकाळी नऊ वाजेपर्यंत चाललेल्या या मैफलीला संगीतप्रेमींनी मोठ्या संख्येने उपस्थित राहून भरभरून प्रतिसाद दिला. गुलाबी थंडी, वाफाळत्या दुधाचा आस्वाद आणि दिव्यांची रोषणाई यामुळे ही पहाट उपस्थितांसाठी अविस्मरणीय ठरली.
स्रोत: मूळ बातमी
Leave a Reply