ढाका येथे झालेल्या पुरुष ब्लाइंड आशिया चषकाच्या अंतिम सामन्यात पावसामुळे एकही चेंडू टाकता आला नाही, तरीही पाकिस्तानला विजेता घोषित करण्यात आलं. या निर्णयावर भारतीय संघाने तीव्र आक्षेप घेतला असून, सामन्यानंतर समोर आलेल्या एका व्हिडीओमुळे वाद आणखी पेटला आहे.
भारत आणि पाकिस्तान यांच्यातील अंतिम सामना पावसामुळे रद्द झाला. त्यानंतर धावगतीच्या आधारावर पाकिस्तानला विजेतेपद देण्यात आलं. भारतीय संघाच्या मते, सामन्यासाठी राखीव दिवस नसल्यामुळे दोन्ही संघांना संयुक्त विजेते घोषित करायला हवं होतं. या निर्णयाच्या निषेधार्थ भारतीय खेळाडूंनी बक्षीस वितरण समारंभावर बहिष्कार टाकला.
पंचांच्या जल्लोषाचा व्हिडीओ समोर
सामन्यानंतर सोशल मीडियावर एक व्हिडीओ समोर आला असून, त्यात एक पाकिस्तानी पंच पाकिस्तानच्या खेळाडूंसोबत जल्लोष करताना दिसत असल्याचा आरोप करण्यात आला आहे. व्हिडीओमध्ये भारताची चेष्टा केली जात असल्याचाही दावा केला जात आहे. व्हिडीओमध्ये विमान अपघाताचा संदर्भ देत ‘ऑपरेशन सिंदूर’वरून भारताची खिल्ली उडवली जात असल्याचाही आरोप करण्यात आला आहे. पंचांनी पूर्णपणे निष्पक्ष राहायला हवं, असं मत भारतीय अंध क्रिकेट संघटनेने व्यक्त केलं आहे.
संयुक्त विजेतेपदाच्या शिफारशीला नकार
भारतीय अंध क्रिकेट संघटनेने (CABI) निवेदन जारी करत म्हटलं आहे की, संबंधित पंचाने संपूर्ण स्पर्धेत पंचगिरी केली होती, मात्र विजयानंतर तो पाकिस्तानच्या खेळाडूंसोबत आनंद साजरा करताना दिसला. पंचगिरीच्या नियमांनुसार पंचांनी कोणत्याही संघाशी संबंधित असल्याचं दाखवता कामा नये, असं संघटनेने म्हटलं आहे. दरम्यान, तांत्रिक समितीने दोन्ही संघांना संयुक्त विजेते घोषित करण्याची शिफारस केली होती, मात्र जागतिक ब्लाइंड क्रिकेट परिषद आणि पाकिस्तान ब्लाइंड क्रिकेट परिषदेचे प्रमुख सुलतान शाह यांनी त्याला मान्यता देण्यास नकार दिल्याचा दावा करण्यात आला आहे. त्यामुळे अंतिम सामन्याच्या निकालावरून सुरू झालेला वाद आता पंचांच्या भूमिकेपर्यंत पोहोचला आहे.
Leave a Reply