त्र्यंबकेश्वर परिसरात भूकंप हालचालींवर विशेष अभ्यास सुरू

नाशिक आणि त्र्यंबकेश्वर येथे होणाऱ्या सिंहस्थ कुंभमेळ्याच्या पार्श्वभूमीवर त्र्यंबकेश्वर परिसरातील भूकंपविषयक हालचालींचा विशेष अभ्यास सुरू करण्यात आला आहे. कुंभमेळ्यासाठी लाखो भाविकांची गर्दी होणार असून त्या दृष्टीने उभारल्या जाणाऱ्या पायाभूत सुविधांच्या सुरक्षिततेसाठी हा अभ्यास महत्त्वाचा मानला जात आहे.

राज्य शासनाच्या विनंतीवरून भारतीय भूवैज्ञानिक सर्वेक्षण विभागाने यासाठी त्र्यंबकेश्वरला विशेष पथक पाठवले आहे. या पथकाकडून त्र्यंबकेश्वर परिसरात आणि त्याच्या परिघात चार अत्याधुनिक यंत्रांच्या माध्यमातून चोवीस तास भूगर्भातील हालचालींवर लक्ष ठेवले जात आहे.

अभ्यासाची गरज का?

सिंहस्थ कुंभमेळ्यात लाखो भाविक, साधू-महंत आणि पर्यटक दाखल होणार आहेत. त्यासाठी राज्य सरकारने रस्ते, पूल आणि घाट तयार करण्याचे काम सुरू केले आहे. पाणीपुरवठा, वीज, आरोग्य आणि वाहतूक व्यवस्था यांसह विविध पायाभूत सुविधांची कामे हाती घेण्यात आली आहेत. एवढ्या मोठ्या संख्येने येणाऱ्या भाविकांच्या आणि सुरू असलेल्या बांधकामांच्या सुरक्षिततेच्या दृष्टीने या परिसरातील भूगर्भीय स्थिती तसेच संभाव्य भूकंपविषयक धोक्यांचा अभ्यास करणे गरजेचे झाले आहे. त्यामुळेच राज्य सरकारने या पथकास पाचारण केले आहे.

जानेवारी २०२७ पर्यंत अभ्यास, मग अहवाल

हा अभ्यास जानेवारी २०२७ पर्यंत सुरू राहणार असून त्यानंतर त्याचा अहवाल राज्य सरकारला सादर केला जाणार आहे. भारतीय भूवैज्ञानिक सर्वेक्षण विभागाचे महासंचालक दिनेश गणवीर यांनी नागपूर येथे ही माहिती दिली. अहवालातून मिळालेल्या निष्कर्षांच्या आधारे कुंभमेळ्याच्या तयारीत आवश्यक ती खबरदारी घेतली जाणार आहे.