नाशिकमध्ये पूर्वांचल शिबिरातून एकतेचा जागर

नाशिक शहरात तीनदिवसीय पूर्वांचल वसतिगृह दिवाळी शिबिर २०२६ ला सुरुवात झाली. राष्ट्रीय स्वयंसेवक संघ जनकल्याण समिती, महाराष्ट्र प्रांताच्या वतीने हे शिबिर आयोजित करण्यात आले आहे. शिबिर जनमानसात पोहोचावे, या उद्देशाने शहरातून विद्यार्थ्यांची शोभायात्रा काढण्यात आली.

शोभायात्रेत ईशान्य भारतातील आसाम, मणिपूर, नागालँड या राज्यांमधून आलेल्या विद्यार्थ्यांनी सांस्कृतिक सादरीकरण केले. पारंपरिक वेशभूषा आणि नृत्याने शोभायात्रेला विशेष रंग आला. शिबिराचे उद्घाटन महापौर हिमगौरी आडके यांच्या हस्ते झाले.

भावनिक बंध दृढ करण्यावर भर

कार्यक्रमाचे अध्यक्ष डॉ. अजित मराठे, नाशिक शहर जिल्हा संघचालक डॉ. विजय मालपाठक आणि शिबिर कार्यवाह प्रशांत महामुनी व्यासपीठावर उपस्थित होते. अध्यक्षीय मनोगतात डॉ. मराठे यांनी पूर्वांचल आणि उर्वरित भारत यांच्यातील भावनिक बंध अधिक दृढ करण्यावर भर दिला. शनिवारी सकाळी दहा वाजता योगेश चकोर यांनी भारत की रक्षासिद्धता – पूर्वांचल परिप्रेक्ष्य या विषयावर व्याख्यान दिले.

स्पर्धा आणि मार्गदर्शन सत्रे

शिबिरादरम्यान चित्रकला, कॅलिग्राफी, हस्तकला, बुद्धिबळ, पथनाट्य, पारंपरिक नृत्य आणि समूहगीत अशा विविध स्पर्धा रंगल्या. रविवारी सकाळी दहा वाजता प्रियांका भट स्वातंत्र्यवीर सावरकर या विषयावर बोलणार आहेत, तर दुपारी अडीच वाजता प्रशांत महामुनी पूर्वांचलमध्ये करिअरच्या संधी या विषयावर मार्गदर्शन करणार आहेत. रविवारी सायंकाळी चार ते सहा या वेळेत सोमनाथ खेडकर यांच्या मार्गदर्शनाने आणि संपूर्ण वंदे मातरमने शिबिराचा समारोप होणार आहे.