धुळ्यात प्रश्नमंजूषा स्पर्धेत विद्यार्थिनी प्रथम; थंडी वाढली

धुळे चॅरिटेबल सोसायटी संचालित इन्स्टिट्यूट ऑफ फार्मसीच्या विद्यार्थिनींनी राज्यस्तरीय प्रश्नमंजूषा स्पर्धेत प्रथम क्रमांक पटकाविला. महाराष्ट्र राज्य तंत्रशिक्षण मंडळाच्या प्रायोजकत्वाखाली शिरपूर येथील आर. सी. पटेल इन्स्टिट्यूट ऑफ फार्मसी येथे ही स्पर्धा झाली. स्पर्धेत डीसीएस इन्स्टिट्यूट ऑफ फार्मसीच्या शेख फैजा आणि अन्सारी हानिया या विद्यार्थिनींनी अव्वल स्थान मिळविले. या यशाबद्दल अध्यक्ष आशिष अजमेरा, उपाध्यक्ष रोहित अजमेरा, प्राचार्य डॉ. शैलेश पाटील यांच्यासह शिक्षकांनी विद्यार्थिनींचे कौतुक केले.

थंडीची चाहूल; तापमान १० ते १२ अंशांवर

शहरात मागील तीन-चार दिवसांपासून किमान तापमान १० ते १२ अंशांवर स्थिरावल्याने गारठ्यात अचानक वाढ झाली आहे. उत्तरेकडून वाहणाऱ्या थंड वाऱ्यांमुळे दिवसाच्या कमाल तापमानातही घट झाली आहे. दिवाळी सणोत्सवाच्या कालावधीत सायंकाळनंतर अचानक वाढलेल्या थंडीमुळे वातावरणात बदल झाला आहे. नोव्हेंबर महिन्याच्या दुसऱ्या आठवड्यातील तापमानातील ही घट हवामान अभ्यासकांच्या अंदाजानुसारच नोंदवली गेली आहे. गेल्या काही महिन्यांपासून उकड्याने त्रास झालेल्या नागरिकांना थंडीची सुरुवात झाल्याने आणि दिवसभरातील उन्हाची तीव्रता काहीशी कमी झाल्याने दिलासा मिळाला आहे.