दिवाळीचा सण आणि त्यानिमित्त मिळालेल्या सुट्ट्यांमुळे जळगाव विमानतळावर प्रवाशांची मोठी गर्दी पाहायला मिळाली. सण साजरा करण्यासाठी घरी परतणारे नागरिक, पर्यटनासाठी बाहेर पडणारी कुटुंबे आणि व्यावसायिक प्रवाशांनी विमान प्रवासाला पसंती दिली. त्यामुळे नोव्हेंबरच्या पहिल्या पंधरवड्यात विमानतळावरील प्रवासी संख्येत लक्षणीय वाढ नोंदवली गेली.
विमानतळ प्राधिकरणाकडून मिळालेल्या आकडेवारीनुसार १ ते १३ नोव्हेंबर या तेरा दिवसांच्या कालावधीत एकूण ५,७७८ प्रवाशांनी जळगाव विमानतळावरून हवाई प्रवास केला. यामध्ये आगमन करणाऱ्या प्रवाशांची संख्या ३,११३ होती, तर २,६६५ प्रवाशांनी येथून प्रस्थान केले. सणासुदीच्या काळात विमानसेवेला मिळालेला हा प्रतिसाद समाधानकारक असल्याचे चित्र आकडेवारीवरून दिसून येते.
तेरा दिवसांत १०६ विमानांची ये-जा
या तेरा दिवसांत जळगाव विमानतळावर एकूण १०६ विमानांची ये-जा झाली. यामध्ये ५३ विमानांचे आगमन झाले, तर तेवढ्याच विमानांनी येथून प्रस्थान केले. पुणे, मुंबई, हैदराबाद आणि अहमदाबाद येथून दिवाळी साजरी करण्यासाठी येणाऱ्या प्रवाशांची संख्या लक्षणीय होती. तर गोव्याकडे दिवाळीच्या सुट्टीत पर्यटनासाठी जाणाऱ्या प्रवाशांची संख्याही बऱ्यापैकी होती.
पाच शहरांसाठी थेट विमानसेवा
सध्या जळगाव विमानतळावरून पुणे, गोवा, हैदराबाद, मुंबई आणि अहमदाबाद या पाच शहरांसाठी विमानसेवा उपलब्ध आहे. दोन विमान कंपन्यांकडून या मार्गांवर सेवा चालवली जात आहे. त्यामुळे खानदेशातील प्रवाशांना महत्त्वाच्या शहरांशी हवाई मार्गाने जोडले जाण्याची सुविधा मिळत आहे.
दिवाळीच्या काळात नातेवाइकांकडे जाणारे नागरिक, पर्यटनासाठी बाहेर पडणारे कुटुंबीय तसेच व्यावसायिक प्रवाशांकडून विमान प्रवासाला पसंती दिली जात आहे. रेल्वे आणि रस्ते प्रवासाच्या तुलनेत कमी वेळेत इच्छित स्थळी पोहोचता येत असल्याने विमानसेवेचा पर्याय अधिक सोयीचा ठरत आहे. सणासुदीच्या हंगामातील प्रवासी संख्या पाहता जळगाव विमानतळावरील हवाई वाहतुकीला चांगली चालना मिळत असल्याचे दिसून येत आहे.
Leave a Reply