ज्येष्ठ समाजसेवक अण्णा हजारे यांच्या आंदोलनाबाबत एका पुस्तकात करण्यात आलेल्या दाव्यानंतर राजकीय वर्तुळात मोठी चर्चा रंगली आहे. पुस्तकात दिल्लीतील आंदोलनाला एका राजकीय पक्षाचा आणि संघटनेचा छुपा पाठिंबा असल्याचा उल्लेख आहे. यावर अण्णा हजारे यांनी स्पष्ट शब्दांत प्रत्युत्तर दिले आहे.
अण्णा हजारे नेमके काय म्हणाले?
कोण काय म्हणतोय किंवा राजकीय पक्ष काय बोलतात, यापेक्षा समाज आणि देश काय मानतो, हे अधिक महत्त्वाचे आहे, असे अण्णा हजारे म्हणाले. मी कधीही कोणत्याही पक्षाचा विचार केला नाही आणि त्यांच्या जवळही गेलो नाही, असे त्यांनी स्पष्ट केले.
मला कोणी निंदा करतो की वंदन करतो, याची मी कधीही चिंता करत नाही. आपण आपले समाज आणि देशाचे काम प्रामाणिकपणे करत राहिले पाहिजे, असे अण्णा हजारे म्हणाले. ज्या रंगाचा चष्मा लावावा, त्याच रंगाचे जग दिसते. त्यांचा चष्माच तसा असल्याने त्यांना तसेच दिसणार, असा टोलाही त्यांनी नाव न घेता लगावला. आपण आयुष्यभर फक्त देश आणि समाजाचा विचार केल्यामुळेच देशभरात लोकांच्या मनात आपल्याबद्दल निखळ प्रेम व आस्था असल्याचे त्यांनी सांगितले.
मंत्री आणि विरोधकांची प्रतिक्रिया
या वादावर बोलताना मंत्री संजय शिरसाट म्हणाले की, तो काळ वेगळा होता. त्याकाळी ‘मी अण्णा हजारे’ अशा टोप्या देखील बाजारात निघाल्या होत्या. मात्र, या मागची सत्यता कोणीही पडताळून पाहिलेली नाही. त्या काळात अजून काय-काय घडले, याचा एक वेगळा इतिहास आहे. तो इतिहास जर काढत बसलो, तर प्रत्येक नेत्यावर टीका होईल, असे ते म्हणाले.
दुसरीकडे, शिवसेना (ठाकरे गट) नेते अंबादास दानवे यांनी पुस्तकातील दाव्याचे समर्थन केले. त्यांनी अण्णा हजारेंवर गंभीर सवाल उपस्थित केले आहेत. अण्णा हजारे यांना पुढे करून देशामध्ये अराजकता निर्माण करणे आणि त्याच्या बळावर स्वतःची पोळी भाजणे, हे एक षड्यंत्र होते, असे ते म्हणाले. हे देशासमोर स्पष्ट झाल्यानंतर अण्णा हजारे त्या विषयावर का बोलले नाहीत? २०१४ नंतर अण्णांनी या विषयावर कधीही तोंड उघडलेले नाही, असा सवालही त्यांनी केला. अण्णा हजारे त्यावेळेस जे बोलत होते, याचा अर्थ त्यांच्याकडून कोणीतरी बोलून घेत होते का, असा प्रश्नही दानवे यांनी उपस्थित केला.
स्रोत: मूळ बातमी
Leave a Reply