देशात पुढील वर्षी सात राज्यांमध्ये विधानसभा निवडणुका होणार आहेत. गोवा, उत्तराखंड, पंजाब, मणिपूर, उत्तर प्रदेश, हिमाचल प्रदेश आणि गुजरात या राज्यांमध्ये निवडणूक होणार असून, संपूर्ण देशाचं लक्ष या निवडणुकांकडे लागलं आहे. या निवडणुकांपूर्वीच त्रिपुरातून एक मोठी बातमी समोर आली आहे. तिथे स्थानिक स्वराज्य संस्थांच्या निवडणुका होणार आहेत आणि मतदानापूर्वीच भाजपच्या उमेदवारांनी मैदान मारलं आहे.
त्रिपुरात २१ शहरांमध्ये स्थानिक स्वराज्य संस्थांच्या एकूण ३४५ जागांसाठी निवडणूक होणार आहे. त्यापैकी ७७ जागांवर भाजपचे उमेदवार मतदानापूर्वीच विजयी झाले आहेत. म्हणजेच या जागांवर आता निवडणूकच होणार नाही. भाजपला मिळालेलं हे यश विरोधी पक्षांसाठी मोठा धक्का मानलं जात आहे.
अर्ज मागे घेतल्याने बिनविरोध विजय
उमेदवारी अर्ज मागे घेण्याच्या शेवटच्या दिवशी ७७ मतदारसंघांमध्ये प्रतिस्पर्धी उमेदवारच उरला नव्हता. त्यामुळे या जागांवर भाजपचे उमेदवार बिनविरोध विजयी झाले. मोहनपूर, कमालपूर, जिरनिया, रानीरबाजार आणि शांतीरबाजार या मतदारसंघांचा यामध्ये समावेश आहे. मतदानापूर्वीच इतक्या मोठ्या संख्येने जागा जिंकणं ही भाजपसाठी मोठी कामगिरी मानली जात आहे.
विरोधकांचे आरोप आणि निवडणूक आयोगाचं स्पष्टीकरण
भाजपचे ७७ उमेदवार विजयी होताच राजकीय वर्तुळात आरोप-प्रत्यारोपांना सुरुवात झाली आहे. त्रिपुरातील प्रमुख विरोधी पक्ष असलेल्या सीपीआय (एम) ने भाजपवर आरोप केला आहे की, आमच्या उमेदवारांना धमक्या देऊन उमेदवारी अर्ज मागे घेण्यास भाग पाडण्यात आलं. मात्र निवडणूक आयोगाने विरोधी पक्षाचे सर्व आरोप फेटाळून लावले आहेत. असा कोणताही प्रकार घडला नसल्याचं निवडणूक आयोगाने म्हटलं आहे.
२०१८ मध्ये झालेल्या विधानसभा निवडणुकीमध्ये पहिल्यांदा त्रिपुरात भाजपने डाव्या पक्षांना पराभवाचा धक्का दिला होता. तेव्हापासून वेगवेगळ्या निवडणुकांमध्ये भाजपाची विजयी घोडदौड सुरूच आहे. या निवडणुकीतही ७७ जागांवर भाजपचे उमेदवार विजयी झाले आहेत. या निकालावरून त्रिपुरामध्ये राजकीय वातावरण चांगलंच तापण्याची शक्यता आहे.
स्रोत: मूळ बातमी
Leave a Reply