गोकुळ दूध संघाच्या निवडणुकीचा निकाल लागल्यानंतर कोल्हापूरच्या राजकारणात आरोप-प्रत्यारोपांची मालिका सुरू झाली आहे. शिवसेनेच्या शिंदे गटाचे नेते आणि माजी आमदार रविंद्र धंगेकर यांनी मंत्री चंद्रकांत पाटील यांच्या कोल्हापुरातील भाषणावर तीव्र शब्दांत टीका केली आहे. पाटील यांचे भाषण नळावर होणाऱ्या भांडणासारखे वाटल्याचे धंगेकर म्हणाले.
सत्ता जाणार, हे लक्षात ठेवा
सत्ता कायम राहत नाही, हे लक्षात ठेवले पाहिजे, असे धंगेकर यांनी म्हटले. लोकांना किळस येईल एवढा माज करू नये, असा इशाराही त्यांनी दिला. एक काळ असा येईल की लोक चौकाचौकात उभे राहून जाब विचारतील. तेव्हा उत्तर देताना अडचण होईल, असेही त्यांचे म्हणणे होते. एखाद्या कुटुंबाच्या व्यवसायावर जाणे ही पाटील यांची जुनी सवय असल्याचा आरोप धंगेकर यांनी केला.
हॉटेलबाहेर चहाची वाट पाहत उभे राहायचा
धंगेकर यांनी पाटील यांच्या जुन्या दिवसांची आठवण करून देत टोला लगावला. तुम्ही हॉटेलबाहेर चहा कोण पाजते का, याची वाट पाहत उभे राहायचा, हे महाराष्ट्राने पाहिले आहे, असे ते म्हणाले. त्यांचे वडील स्कूटरवर फिरायचे. तुम्ही शबनम बॅग घेऊन हॉटेलबाहेर उभे होता ना, असा सवाल त्यांनी केला. काँग्रेसमध्ये काय चालते आणि भाजपमध्ये काय चालते, हे पाटील यांना सर्व माहित असते, असेही धंगेकर म्हणाले. त्यांना विचारल्याशिवाय कोणी काही करत नाही, असा टोलाही त्यांनी लगावला. सोनिया गांधी यांनीही सांगितले असेल की त्यांनी मला अशी धमकी दिली होती, असे धंगेकर म्हणाले.
दोन्ही ठाकरे एकत्र येणार?
याचवेळी धंगेकर यांनी राज ठाकरे आणि उद्धव ठाकरे एकत्र येण्याबाबतही मोठे विधान केले. मराठी माणसे एकत्र आली तर आनंद आहे आणि ती आलीच पाहिजेत, असे ते म्हणाले. मराठी माणसाच्या दृष्टीने हे महत्त्वाचे असल्याचे सर्वांचे मत असल्याचे त्यांनी सांगितले. राजकारणात मुफ्ती सय्यद आणि भाजप एकत्र येऊ शकतात, तर ठाकरे बंधू का एकत्र येऊ शकत नाहीत, असा सवाल त्यांनी केला. एक वडिलांचा वारस आहे आणि एक विचारांचा वारस आहे. त्यांच्यात फार अंतर नाही, ते जवळचे आहेत आणि हे एकत्र येणे होऊन जाईल, असे धंगेकर म्हणाले.
स्रोत: मूळ बातमी
Leave a Reply