नाशिक शहरातील पंचवटी भागात असलेल्या प्राचीन काळाराम मंदिरासह जिल्ह्यातील त्र्यंबकेश्वर आणि सप्तशृंगीदेवी या देवस्थानांच्या कार्यालयीन ई-मेलवर धमकीचे संदेश आल्याची माहिती सोमवारी समोर आली. हे संदेश मिळताच शहर आणि ग्रामीण पोलिस यंत्रणा सतर्क झाली असून मंदिरांच्या सुरक्षेत तातडीने वाढ करण्यात आली आहे.
सध्या दिवाळीचा सण सुरू असून सुट्यांच्या काळात देवदर्शनासाठी मंदिरांमध्ये भाविकांची मोठी गर्दी होत असते. याच काळात काही देवस्थानांच्या कार्यालयीन पत्त्यावर धमकीचे मेल पाठवण्यात आल्याचे समोर आले. संबंधित देवस्थानांनी ही माहिती तातडीने स्थानिक पोलिसांना दिली.
गेल्या आठवड्यात राज्यातील काही जिल्हा न्यायालयांनाही अशाच प्रकारचे धमकीचे ई-मेल आले होते. पोलिसांनी त्या वेळी कसून तपासणी केली असता ती बाब अफवा असल्याचे स्पष्ट झाले होते. तरीही सध्याच्या धमकीच्या पार्श्वभूमीवर पोलिस आणि सुरक्षा यंत्रणांनी कोणतीही कसर न सोडता कडेकोट बंदोबस्त तैनात केला आहे.
## मंदिर परिसरात तपासणी आणि गस्त वाढवली
काळाराम मंदिर परिसरात बॉम्ब शोधक व नाशक पथक तसेच श्वानपथकाने कसून तपासणी केली. मंदिर परिसरात पोलिसांची गस्त वाढवण्यात आली असून कडेकोट बंदोबस्त तैनात करण्यात आला आहे. त्र्यंबकेश्वर येथील त्र्यंबकराज मंदिर आणि सप्तशृंगीदेवी मंदिर परिसरातही तशाच प्रकारे बंदोबस्त वाढवण्यात आला आहे.
या मंदिरांमध्ये येणाऱ्या भाविकांची कसून तपासणी केली जात आहे. तपासणीसाठी मेटल डिटेक्टरचा वापर केला जात असून संशयास्पद वाटणाऱ्या व्यक्तींची चौकशी केली जात आहे.
शहर गुन्हे शाखेचे सहायक आयुक्त संदीप मिटके यांनी सांगितले की, काळाराम मंदिर देवस्थानला धमकीचा ई-मेल आला असून त्याची गंभीर दखल घेत बंदोबस्तात वाढ करण्यात आली आहे. पथकांकडून कसून तपासणी करण्यात आली असून पोलिसांची गस्तही वाढवण्यात आली आहे. भाविकांनी कोणतीही भीती बाळगू नये, पोलिसांकडून कडेकोट सुरक्षा पुरवली जात असल्याचे त्यांनी सांगितले.
स्रोत: मूळ बातमी
Leave a Reply