नाशिक शहरात दररोज पहाटे घराघरांत वृत्तपत्र पोहोचवणाऱ्या विक्रेत्यांच्या कामाची दखल पोलिस प्रशासनाने घेतली आहे. त्यांच्या सेवेबद्दल आणि समाजातील योगदानाबद्दल आदर व्यक्त करत पोलिसांनी विक्रेत्यांचा सन्मान केला. दिवाळीच्या निमित्ताने आयुक्त कार्यालयात झालेल्या कार्यक्रमात शहर आणि परिसरातील प्रमुख विक्रेता संघटनांच्या पदाधिकाऱ्यांना आमंत्रित करण्यात आले होते.
पोलिस आयुक्त संदीप कर्णिक यांच्या संकल्पनेतून हा सन्मान सोहळा आयोजित करण्यात आला होता. सहायक पोलिस आयुक्त संदीप मिटके यांच्या हस्ते पदाधिकाऱ्यांचा गौरव करण्यात आला. पोलिस प्रशासनाकडून अशा प्रकारे वृत्तपत्र विक्रेत्यांचा सन्मान करण्याची ही पहिलीच वेळ असल्याने सर्व विक्रेत्यांमध्ये आपुलकीचे आणि उत्साहाचे वातावरण निर्माण झाले आहे.
चार संघटनांचे पदाधिकारी उपस्थित
या वेळी नाशिक शहर वृत्तपत्र विक्रेता संघटना, नाशिक रोड वृत्तपत्र विक्रेता सेवाभावी संस्था, वृत्तपत्र विक्रेता सेवाभावी संस्था (नवीन नाशिक) आणि सातपूर वृत्तपत्र विक्रेता संघटना या चारही संघटनांचे पदाधिकारी उपस्थित होते. बैठकीत सहायक पोलिस आयुक्त संदीप मिटके यांनी वृत्तपत्र विक्रीच्या दैनंदिन व्यवस्थापनाची सखोल माहिती जाणून घेतली.
या कार्यक्रमाला शहर वृत्तपत्र संघटनेचे अध्यक्ष चंद्रकांत पवार, सिडको वृत्तपत्र सेवाभावी संस्थेचे अध्यक्ष दत्तात्रेय ठाकरे, नाशिक रोड वृत्तपत्र सेवाभावी संस्थेचे अध्यक्ष सुनील मगर यांच्यासह राहुल दुशिंग, ज्ञानेश्वर धात्रक, सचिन शेटे, विजय सोनार, जय भालेराव, संजय शेलार, किरण कर्जतकर व अतुल शिरोडे आदी पदाधिकारी उपस्थित होते.
स्रोत: मूळ बातमी
Leave a Reply