श्री शिवाजी विद्या प्रसारक संस्थेच्या बापूसाहेब शिवाजीराव देवरे अभियांत्रिकी महाविद्यालयात पोक्सो व अन्य स्त्री संरक्षण विषयक कायदे आणि सायबर गुन्हेगारी यावर जनजागृती कार्यक्रम झाला. महाविद्यालयाच्या महिला अंतर्गत तक्रार निवारण समिती आणि उच्च न्यायालय, मुंबई यांच्या सुरक्षित बचपन अभियानांतर्गत जिल्हा विधी सेवा प्राधिकरण, धुळे यांच्या वतीने हा कार्यक्रम आयोजित करण्यात आला होता.
या कार्यक्रमाला अति. सत्र न्यायाधीश ए. ए. भोसले, तदर्थ जिल्हा न्यायाधीश एम. जी. सराफ, जिल्हा विधी सेवा प्राधिकरणाचे सचिव न्यायाधीश प्रवीण कुलकर्णी, ॲड. श्रीमती बी. एस. वाघ, प्राचार्य प्रा. डॉ. हितेंद्र पाटील, ॲप्लाइड सायन्स विभागप्रमुख प्रा. डॉ. अभिजित मोरे आदी उपस्थित होते.
मान्यवरांचे विद्यार्थ्यांना मार्गदर्शन
कार्यक्रमात न्यायाधीश भोसले यांनी सोशल मीडियाचा वापर आणि वाढती सायबर गुन्हेगारी यावर मार्गदर्शन केले. ॲड. श्रीमती वाघ यांनी विद्यार्थ्यांना अभ्यासावर लक्ष केंद्रित करून सोशल मीडियाचा माफक वापर करण्याचे आवाहन केले. प्राचार्य डॉ. पाटील यांनी विद्यार्थ्यांना अभ्यासावर लक्ष देण्याचे आवाहन करताना सोशल मीडियाच्या माध्यमातून होणाऱ्या गुन्हेगारीपासून स्वतःला दूर ठेवण्याचे आवाहन केले. न्यायाधीश सराफ यांनी पोक्सो कायदा, त्यातील तरतुदी, विद्यार्थ्यांनी या संदर्भात घ्यायची काळजी आणि सोशल मीडिया वापरताना घ्यायची काळजी यावर सविस्तर मार्गदर्शन केले.
न्यायाधीश कुलकर्णी यांनी बाललैंगिक गुन्हेगारी, नालसा आणि जिल्हा विधी सेवा प्राधिकरणाद्वारे दिले जाणारे मोफत कायदेविषयक सहकार्य यावर मार्गदर्शन केले. प्रारंभी प्राचार्य डॉ. पाटील यांनी अतिथींचे स्वागत केले. महाविद्यालयाच्या महिला अंतर्गत तक्रार निवारण समितीच्या समन्वयक प्रा. मेधा जोशी आणि सचिव प्रा. डॉ. संगीता राजपूत उपस्थित होत्या. प्रा. दीपमाला पाटील यांनी सूत्रसंचालन केले.
स्रोत: मूळ बातमी
Leave a Reply