जळगाव, ८ नोव्हेंबर : ग्रामीण भागातील महिलांनी स्वतःच्या हाताने तयार केलेल्या वस्तूंना दिवाळीच्या काळात चांगली बाजारपेठ मिळाली आणि त्यांच्या मेहनतीचे चीज झाले. जळगाव जिल्ह्यातील नशिराबाद-भादली बुद्रुक प्रभागात आधार महिला प्रभाग संघाच्या वतीने दिवाळी महोत्सवाचे आयोजन करण्यात आले होते. ग्रामविकास व पंचायतराज विभागांतर्गत महाराष्ट्र राज्य ग्रामीण जीवनोन्नती अभियान (उमेद), जिल्हा ग्रामीण विकास यंत्रणा आणि पंचायत समिती यांच्या सहकार्याने हा महोत्सव पार पडला.
घरगुती उत्पादनांना मिळाली बाजारपेठ
महोत्सवात महिला स्वयंसहाय्यता समूहांनी तयार केलेल्या विविध घरगुती आणि पारंपरिक वस्तूंच्या विक्रीसाठी स्टॉल उभारण्यात आले होते. या स्टॉलवर महिलांनी स्वतः बनवलेले घरगुती पारंपरिक फराळ, आकाश कंदील, आकर्षक दिवे, इमिटेशन ज्वेलरी, साड्या आणि इतर अनेक वस्तू विक्रीसाठी ठेवल्या होत्या. दिवाळी हा आनंद, उत्साह आणि प्रकाशाचा सण असल्याने या काळात अशा वस्तूंना मोठी मागणी असते. त्यामुळे महिलांच्या उत्पादनांना हक्काची बाजारपेठ मिळवून देण्याच्या उद्देशाने या महोत्सवाचे आयोजन करण्यात आले होते.
या उपक्रमामुळे महिलांना आपले कौशल्य दाखवण्याची, आपली उत्पादने थेट ग्राहकांपर्यंत पोहोचवण्याची आणि त्यातून स्वतःचे उत्पन्न वाढवण्याची संधी मिळाली. बचत गटांच्या माध्यमातून महिला आता केवळ बचत आणि आर्थिक व्यवहारांपुरत्या मर्यादित राहिलेल्या नाहीत; उत्पादन, व्यवसाय, विपणन आणि उद्योजकता या क्षेत्रांतही त्या पुढाकार घेत आहेत. अशा उपक्रमांमधून ग्रामीण महिला ‘लखपती दीदी’ होण्याच्या दिशेने वाटचाल करत आहेत, असा या महोत्सवामागील उद्देश होता.
महिलांच्या पुढाकाराला मार्गदर्शनाची साथ
महोत्सवाच्या आयोजनासाठी जिल्हा ग्रामीण यंत्रणेचे प्रकल्प संचालक राजू लोखंडे, गटविकास अधिकारी चंद्रकांत बोडरे आणि जिल्हा अभियान व्यवस्थापक हरेश्वर भोई यांचे मार्गदर्शन लाभले. प्रभाग समन्वयक हेमांगी टोकेकर यांनी या उपक्रमात पुढाकार घेतला, तर आधार महिला प्रभाग संघातील पदाधिकारी आणि नशिराबाद-भादली बुद्रुक प्रभागातील १८ ग्रामसखी ताई यांचे विशेष सहकार्य मिळाले.
महिला स्वयंसहाय्यता समूहातील माया भावसार, सुनीता भावसार, वैशाली तारकस, कृष्ण वर्षा वाणी, लीना वाणी, भारती पाटील आणि ज्योती पूनसे या महिलांनी पारंपरिक पद्धतीने तयार केलेला चविष्ट फराळ, लक्ष्मीच्या मूर्ती, पणत्या, पूजेचे साहित्य, आकाश कंदील, शोभेच्या वस्तू, साड्या आणि इमिटेशन ज्वेलरी विकून लाखोंची उलाढाल केली. त्यांच्या या यशामुळे लखपती दीदी योजनेचा उद्देश प्रत्यक्षात उतरल्याचे दिसून आले.
स्रोत: मूळ बातमी
Leave a Reply