उरुळी कांचन परिसरात अकरा तासांत ३०.५ मिमी पाऊस

दुष्काळाच्या झळा सोसत असलेल्या उरुळी कांचन परिसरात पावसाने काहीसा दिलासा दिला आहे. अकरा तासांच्या कालावधीत येथे ३०.५ मिलिमीटर पावसाची नोंद झाली. ऑक्टोबर महिन्यातील तीव्र उष्णतेने हैराण झालेल्या नागरिकांना या पावसाच्या थंडाव्यामुळे सुखावह वाटले. सोमवारी पहाटे चारच्या सुमारास पावसाचा जोर सर्वाधिक होता.

पिकांवर संमिश्र परिणाम

पुरेसा पाऊस न मिळाल्याने भात, सोयाबीन आणि बाजरी ही खरीप पिके धोक्यात आली होती. त्यापैकी जी पिके टिकली होती, त्यांची काढणी झाली आहे. मात्र भाजीपाला वर्गातील पिके आणि डाळिंबासारख्या फळझाडांचे नुकसान झाले आहे. दुसरीकडे कांद्याची नवीन लागवड आणि ऊस या पिकांना या पावसाचा फायदा होण्याची शक्यता आहे. खरीप हंगाम दुष्काळाच्या झळा सोसत असताना रब्बी हंगामही दुष्काळाच्या छायेत अडकला होता. या पावसामुळे गहू, हरभरा आणि चारा पिकांसाठी दिलासादायक वातावरण तयार झाले असून, दिवाळीच्या तोंडावर उत्पादकांना थोडासा दिलासा मिळाला आहे.

वनराईला जीवदान

सर्वदूर पडलेल्या पावसामुळे रखरखणारे वातावरण शांत झाले आहे. डोंगरमाथ्यावर असलेल्या वनराईला मिळालेल्या पाण्यामुळे तिला नवसंजीवनी मिळाली आहे. जमिनीतील पाण्याची पातळी वाढल्याने काही ठिकाणच्या पिण्याच्या पाण्याच्या समस्येला आधार मिळाला आहे. हा पाऊस नवरात्रीत पडला असता तर शेतीची कामे अधिक उत्साहात करता आली असती आणि दुष्काळाची तीव्रता कमी झाली असती, अशी भावना कस्तुरी प्रतिष्ठानचे अध्यक्ष मिलिंद मेमाणे यांनी व्यक्त केली.

स्रोत: मूळ बातमी