नंदुरबार: रोहयोच्या १२ हजार कामांतून २२ हजारांना रोजगार

दुष्काळी परिस्थितीमुळे ग्रामीण भागातील मजुरांना स्थानिक पातळीवर रोजगार उपलब्ध करून देऊन स्थलांतराला आळा घालण्यासाठी नंदुरबार जिल्हा प्रशासनाने विविध उपाययोजना हाती घेतल्या आहेत. महाराष्ट्र रोजगार हमी योजनेंतर्गत विकसित भारत रोजगार व आजीविका हमी अभियान (ग्रामीण) योजनेंतर्गत जिल्ह्यातील ६४३ ग्रामपंचायतींपैकी ६३१ ग्रामपंचायतींमध्ये एकूण १२ हजार २८३ कामे सुरू करण्यात आली आहेत. या कामांच्या माध्यमातून २२ हजार ६३३ मजुरांना रोजगार उपलब्ध करून देण्यात आला आहे. उर्वरित १२ ग्रामपंचायतींमध्ये सध्या एकही काम सुरू नाही. विविध विभागांच्या समन्वयातून गावोगावी सार्वजनिक तसेच वैयक्तिक लाभाची कामे हाती घेण्यात आली आहेत.

कोणती कामे सुरू आहेत

कृषी विभागामार्फत फळबाग लागवडीची १६८ आणि कंपार्टमेंट बंडिंगचे एक काम सुरू आहे. वनविभागामार्फत रोपवनाची ६०, रोपवाटिकांची सहा, एलबीएसची तीन आणि सीसीटीचे एक काम सुरू आहे. सामाजिक वनीकरण विभागामार्फत रस्त्याच्या दुतर्फा वृक्षलागवडीची ५७, वृक्षलागवडीची चार आणि रोपवाटिकांची सहा कामे सुरू आहेत. सार्वजनिक बांधकाम विभागामार्फत रस्त्यांची ६४ आणि पेव्हर ब्लॉकची तीन कामे सुरू आहेत. ग्रामपंचायतींमार्फत घरकुलांची ११ हजार ३१७, बांबू लागवडीची २४८, सिंचन विहिरींची १९१, रस्त्यांची १९, वृक्षलागवडीची २४, पेव्हर ब्लॉकचे एक, अस्तरीकरण शेततळ्यांची १०, गुरांच्या गोठ्यांची १०, जलतारा शोषखड्ड्यांची १०, शेळीपालन शेडची सहा, अंगणवाडीची दोन आणि गाळ काढण्याचे एक काम सुरू आहे. जिल्हा परिषद बांधकाम विभागामार्फत रस्त्यांची ५७, पेव्हर ब्लॉकची १४ आणि इतर विविध कामांचा समावेश आहे.

स्थलांतर नियंत्रण कक्षाची हेल्पलाईन

तालुकानिहाय आकडेवारीनुसार अक्कलकुवा येथे २,९९८ कामे आणि ५,२३१ मजुरांची उपस्थिती, अक्राणी येथे १,४८६ कामे आणि ३,६३६ मजूर, नंदुरबार येथे २,४४१ कामे आणि ३,८५३ मजूर, नवापूर येथे २,०५१ कामे आणि ४,०९० मजूर, शहादा येथे २,३२७ कामे आणि ३,६०४ मजूर, तर तळोदा येथे ९८० कामे आणि २,२१९ मजूर नोंदवले गेले आहेत. ग्रामीण मजुरांच्या रोजगारासाठी जिल्हा प्रशासनाने मुळवाट स्थलांतर नियंत्रण कक्षा हेल्पलाईन क्रमांक ०२५६४-२९९५४४ कार्यान्वित केला आहे. कोणत्याही ग्रामस्थास किंवा मजूर बांधवास रोजगाराची आवश्यकता असल्यास अथवा रोजगाराशी संबंधित अडचण असल्यास या हेल्पलाईनवर संपर्क साधावा, असे आवाहन जिल्हाधिकारी डॉ. मिताली सेठी यांनी केले आहे.

स्रोत: मूळ बातमी