नाशिक सिंहस्थ: ध्वजदंड प्रतिष्ठा सोहळा सुरू, उद्या ध्वजारोहण

नाशिक-पंचवटीतील रामतीर्थ परिसरात सिंहस्थ कुंभमेळ्याच्या ध्वजारोहणानिमित्त पुरोहित संघाच्या वतीने तीन दिवसीय ध्वजदंड प्रतिष्ठा सोहळा व धार्मिक विधी होत आहेत. यज्ञविद्या वाचस्पती वेदमूर्ती भालचंद्र एकनाथ शास्त्री शौचे गुरुजी आणि यज्ञ आचार्य पंडित वैभव दीक्षित यांच्या मार्गदर्शनाखाली शास्त्रोक्त आणि वेदोक्त पद्धतीने हा सोहळा पार पडत आहे.

तीन दिवसांचा विधींचा कार्यक्रम

शुक्रवारी, ३० ऑक्टोबर रोजी सकाळी ८:१५ वाजता नगरप्रदक्षिणा होईल. त्यानंतर सकाळी ९ ते दुपारी १२:३० या वेळेत तीर्थ पूजन, पंचार्घ्य प्रदान, प्रधान संकल्प, गणेश पूजनादी पंचांग विधान, ब्राह्मण वरण, प्रधान देवता स्थापन आणि नवग्रह रुद्र स्थापन होणार आहे. दुपारी २:३० ते सायंकाळी ७:३० या वेळेत स्नपन विधान, नवग्रह हवन, प्रतिष्ठापना हवन, धान्याधिवास, शय्याधिवास, सायंपूजन आणि गोदावरी प्रार्थना होईल.

शनिवारी, ३१ ऑक्टोबर रोजी सकाळी ८ ते दुपारी १ या वेळेत स्थापित देवतांचे प्रातर्पूजन होईल. सकाळी ११ ते दुपारी १२:३० या वेळेत राष्ट्रपती व प्रमुख पाहुण्यांच्या उपस्थितीत संकल्प, गणेश पूजन, पंचार्घ्य समर्पण व तीर्थ पूजन होणार असून दुपारी ठीक १२:०२ वाजता मुख्य ध्वजारोहण, गोदाआरती व प्रार्थना होईल. सायंकाळी ४:३० ते ७:३० या वेळेत प्रतिष्ठापना हवन, सायंपूजन व गोदाआरती होणार आहे. रविवारी, १ नोव्हेंबर रोजी सकाळी ९:३० ते दुपारी १२:३० या वेळेत प्रातर्पूजन, उत्तरांग हवन, बलिदान, पूर्णाहुती, अवभृत स्नान, गोदाआरती, प्रार्थना आणि कर्म समर्पण हे कार्यक्रम होणार आहेत.

या कार्यक्रमास आवर्जून उपस्थित राहावे, असे आवाहन श्री गंगा गोदावरी पंचकोठी पुरोहित संघाचे प्रमुख विश्वस्त सतीश शुक्ल, अध्यक्ष चंद्रशेखर पंचाक्षरी, उपाध्यक्ष दिलीप शुक्ल, वैभव दीक्षित, सरचिटणीस प्रतीक शुक्ल आणि कार्याध्यक्ष शेखर शुक्ल यांनी केले आहे.

रामतीर्थावर जनजातीय सिंहस्थ महाआरती

सिंहस्थ कुंभपर्वाच्या पार्श्वभूमीवर रामतीर्थ गोदावरी सेवा समितीच्या वतीने शनिवारी, ३१ ऑक्टोबर रोजी रामतीर्थ येथे गोदापूजन व जनजातीय सिंहस्थ महाआरतीचे आयोजन करण्यात आले आहे. या सोहळ्यास भारताच्या राष्ट्रपती द्रौपदी मुर्मू यांची प्रमुख उपस्थिती लाभणार आहे. या महाआरतीचे महत्त्वाचे वैशिष्ट्य म्हणजे विविध समाजघटकांतील महिला पुरोहित म्हणून गोदावरी मातेच्या पूजनविधीचे पौरोहित्य करणार आहेत. धार्मिक विधींचे निवेदन, पूजनविधीचे मार्गदर्शन आणि महाआरतीच्या नेतृत्वाची संपूर्ण धुरा महिला पार पाडणार आहेत. जनजातीय बांधवांचा सन्मानपूर्ण सहभाग आणि त्यांच्या सांस्कृतिक परंपरांचा गौरव हे या आयोजनाचे आणखी एक आकर्षण आहे. गोदावरी माता सर्वांची आणि तिची सेवा सर्वांची, या संदेशातून सामाजिक समरसता व्यक्त होणार आहे.

स्रोत: मूळ बातमी