कऱ्हाड येथील उपप्रादेशिक परिवहन कार्यालयात रिक्षांचे पासिंग काही दिवसांपासून ठप्प झाले आहे. स्वयंचलित फिटनेस केंद्र बंद पडल्यामुळे शेकडो रिक्षा विनापासिंग उभ्या आहेत. त्यामुळे प्रवासी वाहतूक करणाऱ्या वाहनचालकांसमोर मोठे संकट उभे राहिले आहे. या पार्श्वभूमीवर प्रियदर्शनी कऱ्हाड तालुका रिक्षाचालक-मालक संघटनेचे संस्थापक अशोकराव पाटील यांनी उपप्रादेशिक परिवहन अधिकाऱ्यांना निवेदन दिले आहे. पासिंग तातडीने सुरू न झाल्यास आंदोलन करण्याचा इशाराही त्यांनी दिला आहे.
निवेदनात कोणत्या मागण्या
निवेदनात रिक्षाचालकांना जिल्हा परमिट आणि इरादा पत्र म्हणजे कच्चे परमिट द्यावे, तसेच त्यांचे नूतनीकरण करून मिळावे, अशी मागणी करण्यात आली आहे. हक्काचा रोजगार उपलब्ध व्हावा यासाठी जिल्हा परमिट गरजेचे असल्याचे निवेदनात म्हटले आहे. तालुक्यातील अवैध व विना-कागदपत्रे रिक्षांवर कारवाई करण्याचीही मागणी झाली आहे. पंधरा वर्षांचा कालावधी पूर्ण झालेल्या व त्याहून जुन्या स्क्रॅप रिक्षा, तसेच पासिंग, विमा किंवा पीयूसी प्रमाणपत्र नसलेल्या गाड्या आणि परवाना व बॅच नसलेल्या चालकांवर कठोर कारवाई करावी, असे निवेदनात नमूद आहे.
प्रवाशांच्या सुरक्षेचा प्रश्न ऐरणीवर
पासिंग बंद असल्यामुळे रिक्षाचालकांना आर्थिक फटका बसत आहे आणि अनेक रिक्षांची कामे रखडली आहेत. प्रवासी वाहतूक करणाऱ्या वाहनांचे पासिंग वेळेत होणे आवश्यक असताना प्रशासनाच्या दुर्लक्षामुळे अपघात झाल्यास जीवितहानी व नुकसान होऊ शकते, अशी भीतीही निवेदनात व्यक्त करण्यात आली आहे.
स्रोत: मूळ बातमी
Leave a Reply