पुणे येथे बालसाहित्य क्षेत्रातील मानाच्या पुरस्कारांची घोषणा करण्यात आली आहे. दिवंगत गायिका स्वरयोगिनी डॉ. प्रभा अत्रे यांच्या मातोश्री व बालसाहित्यकार इंदिराबाई अत्रे यांच्या स्मरणार्थ हे पुरस्कार दिले जातात. यंदाच्या पुरस्कारांच्या मानकऱ्यांची नावे गुरुवारी जाहीर झाली. डॉ. प्रभा अत्रे फाउंडेशनच्या सचिव डॉ. भारती एम. डी. व कार्यक्रम निर्देशक प्रसाद भडसावळे यांनी ही माहिती दिली.
कोणते मानकरी, कोणती पुस्तके
गणेश मतकरी यांच्या ‘इअरफोन्स’, प्रणव सखदेव यांच्या ‘के कनेक्शन्स’ आणि आश्लेषा महाजन यांच्या ‘गप्पी गप्पा आणि इतर कथा’ या पुस्तकांना पुरस्कार जाहीर झाला आहे. ऋषिकेश दाभोळकर व हर्षल कोऱ्हाळे यांच्या ‘कुल्फी’ दिवाळी अंकालाही पुरस्कार मिळाला आहे. अभिषेक जाखडे लिखित ‘जंगलातलं चांदणं’ या पुस्तकाचे मुखपृष्ठ व आतील चित्रे रेखाटल्याबद्दल चित्रकार सई देशपांडे यांचा गौरव होणार आहे. श्रीपाद ब्रह्मे यांचे ‘फुलपाखरू’ आणि संजय ऐलवाड यांचे ‘झिब्राची गोष्ट’ ही पुस्तके विशेष उल्लेखनीय पुस्तके म्हणून निवडली गेली आहेत.
पुरस्कार वितरण सोहळा कधी, कुठे
पुरस्कार वितरण सोहळा १४ नोव्हेंबरला सकाळी ११ वाजता होणार आहे. नवी पेठेतील पत्रकार भवनाच्या मुख्य सभागृहात हा सोहळा रंगेल. ज्येष्ठ साहित्यिक व माजी संमेलनाध्यक्ष भारत सासणे यांच्या हस्ते मानकऱ्यांना पुरस्कार प्रदान केले जातील.
स्रोत: मूळ बातमी
Leave a Reply