मध्य प्रदेशातील पन्ना जिल्ह्यात जमीन खोदणाऱ्या पाच जणांचे नशीब अचानक बदलले आहे. साधे जीवन जगणाऱ्या या लोकांना खाणीत हिरे सापडले आणि ते लखपती-करोडपती झाले.
ऑटोचालकाला ३.१७ कॅरेटचा हिरा
२० नोव्हेंबर २०२६ रोजी पन्ना येथील ऑटोचालक सोनू रैकवार यांचे नशीब फळफळले. त्यांना गेल्या काही दिवसांपासून हिरा सापडल्याचे स्वप्न वारंवार पडत होते. त्यांनी ही गोष्ट कुटुंबीयांना सांगितली आणि हिरा कार्यालयात जाऊन परवाना काढला. राणीपूर परिसरात त्यांनी पहिल्यांदाच खाणीत खोदकाम सुरू केले. १५ दिवसांत त्यांना ३.१७ कॅरेटचा दर्जेदार हिरा सापडला. त्याची अंदाजित किंमत ११ ते १५ लाख रुपये आहे.
शेतकऱ्याला ३२.८० कॅरेटचा हिरा
पन्ना येथील शेतकरी स्वामीदीन पाल यांनाही असेच नशीब लाभले. दोन वर्षांपूर्वी त्यांनी खोदकामाचा परवाना घेतला होता. सरकोहा परिसरात भाडेतत्त्वावर घेतलेल्या खाणीत त्यांना ३२ कॅरेट ८० सेंटचा दर्जेदार हिरा मिळाला. त्याची अंदाजे किंमत एक कोटी रुपये होती.
कृष्णा कल्याणपूर येथील पटी उथळ हिरा खाणीत राजू गोंड यांना १९ कॅरेट २२ सेंटचा हिरा सापडला. मोलमजुरी आणि कधी ट्रॅक्टर चालवून उदरनिर्वाह करणाऱ्या राजू यांनी इतरांच्या प्रेरणादायी कथा ऐकून परवाना काढला होता. त्यांच्या हिऱ्याची अंदाजित किंमत ८० लाख ते एक कोटी रुपयांदरम्यान आहे.
मोलमजुरी करणाऱ्या रचना गोलदार यांना एकाच आठवड्यात आठ हिरे मिळाले. या हिऱ्यांचे एकूण वजन २.५३ कॅरेट होते, त्यातील सहा हिरे उच्च दर्जाचे होते. हे हिरे लिलावासाठी ठेवण्यात आले असून त्यातून त्यांना कोट्यवधी रुपये मिळण्याची खात्री आहे.
पन्नास वर्षे मोलमजुरी करणाऱ्या मोतीलाल प्रजापती यांनाही एकाच आठवड्यात दीड कोटी रुपयांचा हिरा हाती लागला. त्यांनी कृष्णा कल्याणपूर पट्टी गावाजवळ एक छोटा भूखंड भाडेपट्ट्यावर घेऊन खोदकाम केले होते.
Leave a Reply