क्रिकेटच्या मैदानावर फिरकी गोलंदाजीने फलंदाजांना अडचणीत आणणारा युजवेंद्र चहल आता राजकारणाच्या मैदानात उतरला आहे. चहलने भारतीय जनता पक्षात प्रवेश केला असून पक्षाच्या नव्याने स्थापन झालेल्या राष्ट्रीय ओबीसी आघाडीच्या कार्यकारी समितीवर त्याची विशेष निमंत्रित सदस्य म्हणून निवड झाली आहे. पक्षाचे राष्ट्रीय अध्यक्ष नितीन नवीन यांनी ही जबाबदारी त्याच्यावर सोपवली आहे.
या नियुक्तीपूर्वी चहलने ओबीसी आघाडीचे अध्यक्ष अमरपाल मौर्य यांची भेट घेतली होती. भाजपने राष्ट्रीय ओबीसी आघाडीच्या नव्या कार्यकारी समितीत देशभरातील विविध राज्यांतील अनेक व्यक्तींना वेगवेगळ्या जबाबदाऱ्या दिल्या आहेत. या यादीत चहलचे नाव असून दिल्लीतून विशेष निमंत्रितांच्या यादीत त्याचा समावेश करण्यात आला आहे.
विशेष निमंत्रित म्हणजे काय?
विशेष निमंत्रित अशा व्यक्ती असतात, ज्या पक्षाची नियमित कार्यकारी किंवा कार्यालयीन पदे सांभाळत नाहीत, तरीही कार्यकारी समितीच्या बैठका आणि संघटनात्मक उपक्रमांमध्ये सहभागी होण्यासाठी त्यांना आमंत्रित केले जाते. ही भूमिका राष्ट्रीय अध्यक्ष, उपाध्यक्ष किंवा महासचिव यांसारख्या नियमित पदांपेक्षा वेगळी असते. विशेष निमंत्रितांचा संघटनेत समावेश असतो, मात्र त्यांची भूमिका नियमित पदाधिकाऱ्यांपेक्षा वेगळी असते. त्यांना संघटनेच्या कामात आणि बैठकांमध्ये सहभागी होण्याची संधी मिळते. त्यांना दिल्या जाणाऱ्या जबाबदाऱ्या आणि या पदावरील त्यांचा कार्यकाळ संघटनेच्या नियमांवर अवलंबून असतो.
चहलची क्रिकेट कारकीर्द
चहलने अलीकडेच कसोटी क्रिकेटमधून निवृत्ती जाहीर केली आहे. मात्र तो एकदिवसीय आणि टी-२० सामन्यांसाठी उपलब्ध आहे. या नव्या भूमिकेत चहल कोणत्या जबाबदाऱ्या स्वीकारणार, याबाबत अद्याप कोणतीही माहिती जाहीर करण्यात आलेली नाही. तसेच तो किती काळ या पदावर राहील, हेही स्पष्ट झालेले नाही.
Leave a Reply