दिवाळीच्या सुट्या संपत असून या आठवड्यापासून शाळांच्या दुसऱ्या सत्राला सुरुवात होणार आहे. फराळाचा आनंद घेतल्यानंतर आता विद्यार्थी पुन्हा शाळेत दाखल होणार आहेत. शहरासह जिल्हाभरातील शाळा गुरुवार (ता. १९) पासून सुरू होत आहेत. सुरुवातीचे एक-दोन दिवस उपस्थिती कमी राहण्याची शक्यता असली तरी शालेय प्रवेशद्वार विद्यार्थ्यांसाठी खुले होणार आहे.
महाविद्यालयांत अभ्यासाला सुरुवात
शैक्षणिक वर्ष २०२६-२७ मध्ये दिवाळी सणानिमित्त शाळांना सुट्या लागल्या होत्या. या काळात विद्यार्थ्यांनी मामाच्या गावी जाऊन आणि मित्रमंडळीसोबत वेळ घालवून सुट्यांचा आनंद घेतला. सुट्या संपत असल्याने शाळांमध्ये स्वच्छता मोहीम हाती घेण्यात आली आहे. व्यावसायिक अभ्यासक्रमांच्या महाविद्यालयांमध्ये सोमवार (ता. १६) पासून अध्ययन प्रक्रिया सुरू झाली आहे.
परीक्षा आणि असाइनमेंटची लगबग
महाविद्यालयीन विद्यार्थ्यांकडून सध्या असाइनमेंट सादर करण्याची लगबग सुरू आहे. पहिल्या सत्रातील काही अभ्यासक्रमांच्या अंतिम परीक्षा नोव्हेंबर आणि डिसेंबर या कालावधीत पार पडणार आहेत. त्यानुसार विद्यार्थ्यांकडून अभ्यासाची उजळणी केली जात आहे.
Leave a Reply