अमेरिकेचे अध्यक्ष डोनाल्ड ट्रम्प यांना मध्यावधी निवडणुकीनंतर पक्षातूनच मोठा धक्का बसला आहे. अध्यक्षपदाच्या दुसऱ्या कार्यकाळात त्यांनी घेतलेले निर्णय वादात अडकले. टॅरिफचा मुद्दा असो किंवा इराणविरोधातील युद्ध, या निर्णयांमुळे त्यांच्या पक्षाला मध्यावधी निवडणुकीत मोठा फटका बसला. निवडणुकीत डेमोक्रॅट पक्षाने विजय मिळवला, तर रिपब्लिकन पक्ष पिछाडीवर राहिला. या घडामोडीनंतर ट्रम्प यांनी व्हाइट हाऊसमध्ये काही बदल करण्याचे निर्णय घेतले. मात्र, आता रिपब्लिकन पक्षात असंतोषाची ठिणगी पडली असून, पक्षातील काही नेत्यांनी बंडाचा इशारा दिला आहे.
आरएनसी अध्यक्ष हटवण्याची मागणी
मध्यावधी निवडणुकीत रिपब्लिकन पक्षाची कामगिरी खराब झाल्यानंतर पक्षात असंतोष वाढू लागला आहे. ट्रम्प यांनी निवडलेल्या रिपब्लिकन नॅशनल कमिटीचे अध्यक्ष जो ग्रूटर्स यांना हटवण्याच्या हालचाली वाढल्या आहेत. रिपब्लिकन राष्ट्रीय समितीत प्रत्येक राज्यातून निवडलेले १६८ सदस्य आहेत. मध्यावधी निवडणुकीतील खराब कामगिरीनंतरही वॉशिंग्टनमधील बहुतांश रिपब्लिकन नेते ट्रम्प यांच्यासोबत आहेत. मात्र, पक्षाच्या राष्ट्रीय समितीतील काही नाराज नेत्यांचा गट ग्रूटर्स यांना हटवण्याची मागणी करत आहे.
बंडखोर गटाने केंटकीमधील केसी क्रॉस्बी यांचे समर्थन केले आहे. क्रॉस्बी सध्या रिपब्लिकन राष्ट्रीय समितीत दुसऱ्या स्थानावर आहेत. ३ नोव्हेंबरच्या निकालानंतर ५ नोव्हेंबरला पत्र लिहून क्रॉस्बी यांनी दावेदारी जाहीर केली होती. मध्यावधी निवडणुकीतील निकाल मोठा धक्का असल्याचे सांगत, झालेल्या चुकांबाबत प्रामाणिकपणे उत्तर द्यावे, असेही त्यांनी म्हटले होते.
क्रॉस्बी देखील ट्रम्प यांच्या मेक अमेरिका ग्रेट अगेन धोरणाचे पुरस्कर्ते आहेत. मात्र, विरोधक या प्रयत्नाला ट्रम्प यांच्या सत्तेला आव्हान मानत आहेत. टेनेसीतील समितीचे सदस्य ऑस्कर ब्रॉक यांनीही क्रॉस्बी यांचे समर्थन केले आहे. आपले काम व्यापक पातळीवर रिपब्लिकन उमेदवारांना विजयी करणे आहे, एका व्यक्तीला समर्थन करणे नाही, असे त्यांनी म्हटले. ब्रॉक यांनी नेतृत्वात बदलाची गरज असल्याचे सांगितले, कारण अध्यक्ष जो ग्रूटर्स त्यांची जबाबदारी योग्यपणे पार पाडू शकले नाहीत. व्हर्जिनियाच्या सदस्य पॅट्टी लाइमॅन यांनीही टेक्सास, दक्षिण कॅरोलिना आणि मिसिसिपी यांसारख्या बालेकिल्ल्यांत पराभव झाल्यानंतरही जुने नेतृत्व कायम ठेवणे पक्षासाठी धोकादायक आणि अपमानास्पद असल्याचे म्हटले. जानेवारीत अरिझोनामध्ये होणाऱ्या पक्षाच्या बैठकीत क्रॉस्बी यांना नामांकन दाखल करण्यासाठी १० राज्यांतील २० सदस्यांचा पाठिंबा लागतो.
ट्रम्प समर्थकांचा पलटवार
रिपब्लिकन पक्षात बंडाचे पडसाद उमटू लागल्याने ट्रम्प आणि व्हाइट हाऊसचे वरिष्ठ अधिकारी नाराज आहेत. ट्रम्प यांनी ट्रुथ सोशलवर एक पोस्ट करत जो ग्रूटर्स यांना मेक अमेरिका ग्रेट अगेन योद्धा म्हटले आणि त्यांना पूर्ण पाठिंबा दिला. बंडखोरांनी भूमिका बदलली नाही, तर निधी संकलनासाठी केली जाणारी मदत बंद केली जाईल, असा इशाराही देण्यात आला आहे.
Leave a Reply