पनवेल महापालिकेने सिडकोने उभारलेल्या वसाहतींमधील रस्ते काँक्रीटचे करण्याचे काम हाती घेतले आहे. कळंबोली आणि खारघरमधील रस्त्यांचे काँक्रीटीकरण झाल्यानंतर आता खांदा कॉलनी आणि नवीन पनवेलकडे लक्ष वळवण्यात आले आहे. या दोन्ही भागांतील प्रत्येकी दोन रस्ते काँक्रीटचे होणार असून, त्यासाठी २५ कोटींहून अधिक रुपये खर्च होणार आहेत. पुढील दोन वर्षांत हे काम पूर्ण होण्याची अपेक्षा आहे.
४५ वर्षांत पहिल्यांदाच काँक्रीटीकरण
सिडकोने या वसाहती उभारल्यापासून गेल्या ४५ वर्षांत येथील बहुतांश रस्ते काँक्रीटचे झाले नव्हते. एचडीएफसी आणि आदई सर्कल परिसरातील रस्ते याला अपवाद आहेत. डांबरी रस्त्यांवर वारंवार खड्डे पडत असल्याने नागरिकांना अडचणींना सामोरे जावे लागत होते. महापालिकेची स्थापना झाल्यानंतर शेकडो कोटी रुपयांची कंत्राटे काढून रस्त्यांच्या काँक्रीटीकरणाला सुरुवात झाली. कळंबोलीत १२५ कोटी रुपयांहून अधिक खर्चाची कामे झाली, तर खारघरमध्येही अनेक ठिकाणी काँक्रीटीकरण करण्यात आले. आता खांदा कॉलनी आणि नवीन पनवेलमधील रस्त्यांचा प्रस्ताव प्रशासनाने महासभेसमोर ठेवला आहे.
खांदा कॉलनीत २५ कोटी ४३ लाखांचा खर्च
खांदा कॉलनीतील प्रभाग १५ मधील सेक्टर १० मधील भूखंड क्रमांक १, इंद्रप्रस्थ सोसायटी ते सेक्टर ११ मधील भूखंड क्रमांक २, सीकेटी महाविद्यालयाजवळील रस्त्यासाठी अंदाजे १२ कोटी ७९ लाख रुपये खर्च अपेक्षित आहे. सेक्टर ८ मधील साईशरण सोसायटी ते आगरी शिक्षण संस्था शाळेजवळील नाल्यापर्यंतच्या रस्त्यासाठी १२ कोटी ६४ लाख रुपये लागणार आहेत. या दोन्ही कामांवर एकूण २५ कोटी ४३ लाख रुपये खर्च होणार आहेत.
नवीन पनवेलमधील प्रभाग १७ मध्ये पहिल्यांदाच रस्त्यांच्या काँक्रीटीकरणासोबत पावसाळी गटारांची कामे होणार आहेत. साईबाबा मंदिर ते आर्या हॉटेलमार्गे पनवेल रेल्वे स्थानकाकडे जाणारा रस्ता आणि भूखंड क्रमांक ४१३/३ ते भूखंड क्रमांक २, संत सावतामाळी हॉलपर्यंतच्या रस्त्यासाठी अंदाजे दोन कोटी ८३ लाख रुपये खर्च अपेक्षित आहे. सेक्टर १७ मधील इच्छापूर्ती गणेश मंदिर ते भाग्यलक्ष्मी अपार्टमेंटपर्यंतच्या रस्त्यासाठी ६७ लाख रुपये लागणार आहेत.
मार्केटयार्ड परिसरात २७ कोटींचे काम
उरण आणि पनवेल तालुक्यांसाठी महत्त्वाच्या असलेल्या पनवेल कृषी उत्पन्न बाजार समितीमधील रस्त्यांची दुरवस्था झाली आहे. तेथील पावसाळी गटारेही खराब झाली आहेत. त्यामुळे मार्केटयार्ड परिसरातील सहा रस्त्यांचे, एकूण १,९०० मीटर लांबीचे काँक्रीटीकरण करण्याचे महापालिकेने ठरवले आहे. या कामासाठी २७ कोटी ७१ लाख रुपये खर्च अपेक्षित असून, येत्या महासभेत या प्रस्तावाला मंजुरी मिळण्याची शक्यता आहे.
Leave a Reply