रणबीर कपूर आणि साई पल्लवी यांच्या प्रमुख भूमिका असलेला, दिग्दर्शक नितेश तिवारी यांचा ‘रामायण’ हा चित्रपट सध्या प्रचंड चर्चेत आहे. भारतीय चित्रपटसृष्टीतील सर्वात महत्त्वाकांक्षी प्रकल्पांपैकी एक म्हणून या चित्रपटाकडे पाहिले जात आहे. भव्य सेट्स, अत्याधुनिक दृश्य परिणाम आणि तांत्रिक कौशल्याच्या जोरावर हा चित्रपट जागतिक स्तरावर प्रेक्षकांसमोर आणण्याची तयारी सुरू आहे. या भव्य चित्रपटाच्या निर्मितीमध्ये एका मराठमोळ्या तरुणाने महत्त्वाची जबाबदारी सांभाळली आहे. त्याचे नाव आहे प्रथमेश पडवळ.
सिंधुदुर्ग जिल्ह्यातील सावंतवाडी तालुक्यातील डेगवे हे प्रथमेशचे मूळ गाव आहे. सध्या तो डोंबिवली येथे राहतो. प्रथमेशने आपल्या मेहनतीच्या जोरावर आंतरराष्ट्रीय चित्रपटसृष्टीत स्वतःची ओळख निर्माण केली आहे. गेल्या ११ वर्षांच्या कारकिर्दीत त्याने तब्बल ११ हॉलिवूड चित्रपट आणि ४ भारतीय चित्रपटांच्या निर्मिती प्रक्रियेत काम केले आहे. त्यामुळे त्याचा हा प्रवास अनेक तरुणांसाठी प्रेरणादायी ठरत आहे.
शिक्षणानंतर ॲनिमेशन क्षेत्रात सुरुवात
प्रथमेशने थ्रीडी ॲनिमेशन आणि व्हीएफएक्स या विषयात विशेष प्रावीण्यासह बी.ए. पदवी मिळवली आहे. २०१५ मध्ये शिक्षण पूर्ण झाल्यानंतर त्याने व्यावसायिक कारकिर्दीला सुरुवात केली. सुरुवातीला थ्रीडी ॲनिमेशन क्षेत्रात काम करताना त्याने या क्षेत्रातील तांत्रिक आणि कलात्मक बारकावे शिकून घेतले. त्यानंतर त्याने व्हिज्युअल इफेक्ट्स म्हणजेच व्हीएफएक्स क्षेत्रात प्रवेश केला. सातत्याने नवीन तंत्रज्ञान शिकणे, कामातील अचूकता आणि मेहनत यामुळे त्याने प्रगती केली.
लेआउट व्हीएफएक्स सुपरवायझरचे काम काय असते?
चित्रपटाच्या निर्मितीमध्ये लेआउट सुपरवायझर ही अत्यंत महत्त्वाची भूमिका असते. एखादे दृश्य पडद्यावर कसे दिसणार, कॅमेरा कोणत्या दिशेने फिरणार, कलाकारांची आणि इतर घटकांची दृश्यातील मांडणी कशी असणार, याचे नियोजन लेआउट विभागात केले जाते. कॅमेऱ्याचे अँगल, हालचाली, दृश्यांचे अवकाशीय नियोजन आणि व्हीएफएक्स प्रक्रियेच्या सुरुवातीच्या टप्प्यांवर देखरेख करण्याची जबाबदारी या पदावर असते. ‘रामायण’सारख्या भव्य चित्रपटात ही जबाबदारी सांभाळणे म्हणजे मोठे आव्हान आहे. भारतीय संस्कृती आणि महाकाव्याशी संबंधित कथा जागतिक स्तरावर सादर करताना प्रत्येक दृश्य प्रभावी आणि विश्वासार्ह दिसणे आवश्यक आहे. अशा प्रकल्पाचा भाग होण्याची संधी प्रथमेशला मिळाली आहे.
मराठमोळ्या तरुणाच्या यशाचे सर्वत्र कौतुक
डेगवे या छोट्याशा गावातून सुरू झालेला प्रथमेशचा प्रवास आज आंतरराष्ट्रीय चित्रपटसृष्टीपर्यंत पोहोचला आहे. त्याच्या यशामुळे सिंधुदुर्ग जिल्ह्यासह संपूर्ण कोकणातून त्याचे कौतुक होत आहे. ‘रामायण’च्या निमित्ताने एका मराठमोळ्या तरुणाचे नाव आंतरराष्ट्रीय चित्रपटाच्या पडद्यामागे जोडले जाणे ही नक्कीच अभिमानाची बाब आहे. मोठ्या संधी मिळवण्यासाठी केवळ मोठ्या शहरात जन्माला येणे किंवा तिथेच शिक्षण घेणे आवश्यक नसते, तर कौशल्य, जिद्द आणि मेहनतीच्या जोरावर जगभरात आपली ओळख निर्माण करता येते, हे प्रथमेशने सिद्ध केले आहे.
Leave a Reply