पाकिस्तानी क्रिममध्ये विषारी पारा; नांदेडमध्ये साठा जप्त

गोरे होण्याची इच्छा अनेकांच्या मनात असते आणि त्यासाठी बाजारात मिळणारी विविध उत्पादने अनेकजण वापरतात. आकर्षक नावे आणि गोरेपणाचे दावे पाहून ग्राहक सहज भुलतात. मात्र नांदेडमध्ये समोर आलेली माहिती धक्कादायक आहे. पाकिस्तानात तयार झालेली सौंदर्यप्रसाधने आरोग्यासाठी घातक असल्याचे तपासणीत निष्पन्न झाले आहे. या प्रकरणात नांदेड पोलिसांनी मोठी कारवाई करत लाखो रुपयांचा साठा जप्त केला आहे.

गोरी ब्युटी क्रिम, सॅण्डल एक्स्ट्रा ब्राईटनिंग आणि गोल्ड शाईन अशी नावे असलेली ही उत्पादने दुकानांमध्ये विकली जात होती. गोरे होण्याच्या नादात अनेकांनी ही क्रिम वापरली असण्याची शक्यता आहे. मात्र या उत्पादनांमध्ये विषारी घटक असल्याचे आता उघड झाले आहे. त्यामुळे ही क्रिम वापरणाऱ्यांच्या आरोग्याला गंभीर धोका निर्माण झाल्याची भीती व्यक्त होत आहे.

फॉरेन्सिक अहवालात धक्कादायक निष्कर्ष

पोलिसांनी जप्त केलेल्या उत्पादनांचे नमुने तपासणीसाठी फॉरेन्सिक लॅबकडे पाठवले होते. त्याचा अहवाल समोर आल्यानंतर विषारी घटकांचे धक्कादायक प्रमाण उघड झाले आहे. अहवालानुसार या क्रिममध्ये पाऱ्याचे प्रमाण परवानगीपेक्षा तब्बल ४८ हजार पटींनी जास्त आढळले आहे. इतक्या मोठ्या प्रमाणातील पारा आरोग्यासाठी अत्यंत घातक मानला जातो.

दुकानावर छापा, साठा जप्त

शहरातील अफराह कलेक्शन या दुकानावर पोलिसांनी छापा टाकला. या कारवाईत पोलिसांनी ३९ लाख ६९ हजार रुपयांचा पाक उत्पादनांचा साठा जप्त केला आहे.