उदगीर तालुक्यासाठी संजय गांधी निराधार अनुदान योजना समितीची पुनर्रचना करण्यात आली आहे. या समितीच्या अध्यक्षांसह शासकीय आणि अशासकीय सदस्यांची नियुक्ती झाली असून, हाळी येथील राजकुमार जनार्दन पाटील यांची अध्यक्षपदी निवड करण्यात आली आहे.
समितीत विविध घटकांचे प्रतिनिधी
समितीमध्ये गुडसूर येथील उमादेवी तोडकर यांची महिला प्रतिनिधी म्हणून, मोघा येथील प्रशांत धनाजी लोभाजी यांची दिव्यांग प्रतिनिधी म्हणून, उदगीर येथील फय्याज नसरुद्दीन शेख यांची सामाजिक क्षेत्रात कार्य करणारी व्यक्ती म्हणून, तर वाढवणा बुद्रुक येथील इंद्रजित पुंडलिक हाळणे यांची ज्येष्ठ नागरिक प्रतिनिधी म्हणून नियुक्ती करण्यात आली आहे.
समितीमध्ये गटविकास अधिकारी किंवा उदगीर नगर परिषदेचे मुख्याधिकारी यांचा शासकीय सदस्य म्हणून समावेश करण्यात आला आहे. उदगीरचे तहसीलदार हे समितीचे सदस्य सचिव म्हणून काम पाहणार आहेत.
लाभार्थ्यांपर्यंत योजनेचा लाभ पोहोचवणे हेच उद्दिष्ट
संजय गांधी निराधार अनुदान योजनेअंतर्गत निराधार, गरजू, दिव्यांग आणि विधवा अशा विविध पात्र लाभार्थ्यांना शासनाच्या योजनांचा लाभ मिळवून देण्यासाठी ही समिती महत्त्वाची भूमिका बजावते. पात्र लाभार्थ्यांच्या प्रस्तावांची छाननी करून त्यांना अनुदानाचा लाभ मिळवून देणे, तसेच योजनेची प्रभावी अंमलबजावणी करण्यासाठी नियमित बैठका घेण्याची जबाबदारी समितीवर राहणार आहे.
स्रोत: मूळ बातमी
Leave a Reply