दूरसंचार सोपा, पण मनातील संवाद कमी होत आहे

उमरगा येथे जागतिक ज्येष्ठ नागरिक दिन आणि अस्मिता विश्वस्त मंडळाच्या वर्धापनदिनानिमित्त आयोजित कार्यक्रमात कवी प्रा. शैलेश महामुनी यांनी तंत्रज्ञानामुळे दूरसंचार सुलभ झाला असला, तरी माणसांमधील मनोमीलन आणि भावनिक संवाद कमी होत चालल्याची खंत व्यक्त केली. तंत्रज्ञानामुळे सातासमुद्रापार असलेल्या व्यक्तींशी व्हिडिओ कॉलद्वारे सहज संवाद साधता येतो, मात्र घरातील आणि परिसरातील ज्येष्ठांशी प्रत्यक्ष संवाद साधण्यासाठी वेळ दिला जात नाही, असे त्यांनी नमूद केले.

इंद्रधनू वृद्ध सेवा केंद्रातील कार्यक्रम

उमरगा येथील अस्मिता विश्वस्त मंडळ संचलित इंद्रधनू वृद्ध सेवा केंद्रात जागतिक ज्येष्ठ नागरिक दिन आणि मंडळाच्या वर्धापनदिनानिमित्त हा कार्यक्रम आयोजित करण्यात आला होता. या कार्यक्रमात प्रा. महामुनी बोलत होते. आर्य समाजाचे मंत्री प्रा. डॉ. व्ही. वाय. जाधव अध्यक्षस्थानी होते. यावेळी मंडळाचे अध्यक्ष तथा ज्येष्ठ सेवाव्रती डॉ. दामोदर पतंगे, ज्येष्ठ नागरिक महासंघाचे डॉ. भास्करराव पाटील, डॉ. सागर पतंगे, प्रभाकरराव हिरवे आणि प्रा. व्यंकटेश रणखांब उपस्थित होते.

पुरस्कारांचे वितरण

कार्यक्रमात कै. अनुसया सोपानराव रणखांब स्मृती श्रावणबाळ पुरस्कार स्वप्नील पतंगे व संगीता पतंगे यांना प्रदान करण्यात आला. तर आदर्श ज्येष्ठ नागरिक दांपत्य पुरस्कार राज्य पुरस्कारप्राप्त आदर्श शिक्षक बसप्पा शिवलिंगप्पा माळगे यांना प्रदान करण्यात आला. प्रास्ताविकात सचिव प्रा. अभयकुमार हिरास यांनी वृद्ध सेवा केंद्राच्या कार्याचा आढावा घेतला. अध्यक्षीय भाषणात प्रा. डॉ. जाधव यांनी ज्येष्ठांना सकारात्मक व सर्जनशील जीवन जगण्याचे आवाहन केले. यावेळी डॉ. दामोदर पतंगे यांचा वाढदिवसानिमित्त सत्कार करण्यात आला. प्रा. हिरास यांनी सूत्रसंचालन केले, तर प्रा. मारुती खमीतकर यांनी आभार मानले.

स्रोत: मूळ बातमी