धमक्यांना घाबरणार नाही; २०२९ मध्ये लढूया — सतेज पाटील

गोकुळ दूध संघाच्या अध्यक्षपदाच्या निवडणुकीनंतर कोल्हापुरातील राजकारण तापले आहे. मंत्री चंद्रकांत पाटील यांनी दिलेल्या इशाऱ्याला काँग्रेस आमदार सतेज पाटील यांनी जोरदार प्रत्युत्तर दिले आहे. सत्तेचा वापर करून दिल्या जाणाऱ्या धमक्या आपल्याजवळ चालणार नाहीत, असे सतेज पाटील यांनी स्पष्ट केले.

मुख्यमंत्र्यांनी डोळे वटारले तर तुमचे साम्राज्य एका दिवसात उद्ध्वस्त होईल, असा इशारा चंद्रकांत पाटील यांनी दिला होता. तसेच मुख्यमंत्र्यांनी केवळ शिक्षणमंत्री या नात्याने आदेश दिला तरी बंटी पाटलांचे काही शिल्लक राहणार नाही, असेही ते म्हणाले होते. तुमच्यात धमक असेल तर मुख्यमंत्र्यांच्या केबिनमध्ये कामे घेऊन जाऊ नका, राहुल गांधींकडून कामे करून घ्या, अशी टीकाही त्यांनी केली होती.

सत्तेच्या धमक्या चालणार नाहीत

या टीकेला उत्तर देताना सतेज पाटील म्हणाले की, सरकारी पदाचा आणि सत्तेचा वापर करून धमक्या देऊ नका. उद्ध्वस्त करतो, बघून घेतो अशा धमक्या माझ्याजवळ चालणार नाहीत. मी सुद्धा पाटील आहे. २०२९ मध्ये कोल्हापूरच्या दहा मतदारसंघांत लढूया, कार्यकर्त्यांच्या बळावर लढूया. पण अशा धमक्यांना आम्ही घाबरणार नाही, असे त्यांनी ठामपणे सांगितले.

चंद्रकांतदादा मोठे होत असताना त्यांची वैचारिक पातळी खालावत आहे, असा टोलाही सतेज पाटील यांनी लगावला. बंटीचा बंटी साहेब झाला नाही, असे चंद्रकांतदादा म्हणाले होते. त्यावर लोकांच्या हृदयात मला बंटी पाटील म्हणूनच राहायचे आहे, साहेब म्हणून नाही, असे सतेज पाटील म्हणाले. मी आणि चंद्रकांतदादा दहा वर्षे एकमेकांविरोधात लढत आहोत. पण स्वर्गीय डॉ. डी. वाय. पाटील यांच्यावर बोलून काय मिळवले, असा सवालही त्यांनी उपस्थित केला.

२०२९ साली आपण एकमेकांच्या विरोधात उभे राहूया, असे आव्हानही सतेज पाटील यांनी दिले. पण सत्तेची भीती घालून धमकी द्यायची नाही. हे कोल्हापूरकर आणि महाराष्ट्र खपवून घेणार नाही, असेही ते म्हणाले.

मुश्रीफांवरही निशाणा

हसन मुश्रीफ यांच्यावरही सतेज पाटील यांनी निशाणा साधला. २०१४ साली उमेश आपटे यांची मदत झाली नसती तर काय झाले असते हे हसन मुश्रीफ यांनी लक्षात ठेवावे, असे ते म्हणाले. बोलताना हसन मुश्रीफ यांनी समविचारी संचालकांना इशारा दिला आहे. शासनाची व्यवस्था कशी वापरू शकतो हे हसन मुश्रीफ यांनी दाखवून दिल्याचे पाटील म्हणाले. वटहुकूम काढून कोणत्याही संस्थेची सत्ता काबीज करू शकतात, म्हणून आम्ही विरोध करत होतो, असे पाटील म्हणाले.

स्रोत: मूळ बातमी