बॉलिवूडचे प्रसिद्ध दिग्दर्शक विवेक अग्निहोत्री दिवाळीत केलेल्या एका पोस्टमुळे चर्चेत आले आहेत. दिवाळीच्या रात्री एक रॉकेट त्यांच्या घराच्या बाल्कनीत आलं आणि थेट सोफ्यावर पडलं. त्यामुळे सोफ्याला आग लागली. त्यांचा सोफा बाल्कनीत ठेवण्यात आला होता. सुदैवाने सोफ्यावरील कापड आगीला प्रतिरोध करणारं होतं, त्यामुळे मोठी हानी टळली आणि कोणतीही मोठी दुर्घटना घडली नाही.
कुत्र्याने वेळीच सावध केलं
अग्निहोत्री यांनी सोशल मीडियावर शेअर केलेल्या पोस्टमध्ये सांगितलं की, रॉकेट सोफ्यावर पडल्यानंतर आग लागली. त्यांच्या कुत्र्याने वेळीच त्यांना सावध केलं. त्यांनी पोस्टमध्ये जळालेल्या सोफ्याचे फोटोही जोडले होते. ही पोस्ट सोशल मीडियावर वेगाने पसरली.
आपल्या पोस्टमध्ये अग्निहोत्री यांनी अग्निसुरक्षेच्या नियमांची अधिक कठोर अंमलबजावणी करण्याची मागणी केली. त्यांनी म्हटलं की अशा प्रकारची रॉकेट्स ही सांस्कृतिक अभिमानाची गोष्ट नाही, तर आगीचा धोका आहे. आपली संस्कृती निष्पाप लोकांचे जीव धोक्यात घालण्याचं समर्थन करत नाही. मुंबईतील अशा आगीच्या घटनांची प्रशासनाने चौकशी करावी आणि नियम मोडणाऱ्यांना जबाबदार धरावं, अशी अपेक्षा त्यांनी व्यक्त केली.
पोस्ट डिलिट करून नवं स्पष्टीकरण
काही वेळानंतर अग्निहोत्री यांनी ही पोस्ट हटवली. त्यानंतर त्यांनी आणखी एक पोस्ट शेअर केली. त्यात त्यांनी सांगितलं की ते आपली आधीची पोस्ट हटवत आहेत. कुणालाही दुखावण्याचा किंवा कुणाच्याही सांस्कृतिक अथवा पर्यावरणीय विचारांना कमी लेखण्याचा त्यांचा हेतू नाही. त्यांनी सर्वांना पुन्हा एकदा दिवाळीच्या शुभेच्छा दिल्या.
स्रोत: मूळ बातमी
Leave a Reply