राज्याचं लक्ष लागलेल्या गोकुळ दूध संघाच्या अध्यक्षपदाची निवड अखेर संपन्न झाली. न्यायालयाने अंतिम निर्णयासाठी तारीख राखून ठेवली असली तरी अध्यक्षपदाची निवडणूक घेण्याचे निर्देश दिले होते. त्यानंतर चेअरमनपदासाठी निवडणूक प्रक्रिया पूर्ण झाली आणि महायुतीचे राजेश पाटील हे गोकुळचे अध्यक्ष बनले आहेत. यानंतर राजकीय वातावरण चांगलंच तापलं आहे. महायुतीच्या नेत्यांनी काँग्रेस आमदार सतेज पाटील यांच्यावर जोरदार टीका केली होती. त्यांच्या या टीकेला सतेज पाटलांनी प्रत्युत्तर दिलं आहे.
आधी भीमा कारखाना सुरळीत चालवा
भाजपचे खासदार धनंजय महाडिक यांनी सतेज पाटील यांच्यावर जोरदार टीका केली होती. त्यांच्या या टीकेला सतेज पाटील यांनी उत्तर दिलं आहे. धनंजय महाडिकांनी आधी आपल्या भीमा साखर कारखान्यावर एक फेरी मारून यावं आणि तो कारखाना सुरळीत चालवावा, असा टोला सतेज पाटलांनी लगावला. तिथल्या कामगारांना पगार दिला जात नाही आणि त्या कारखान्यावर जप्ती आली आहे, ते आधी बघावं, असं सतेज पाटील म्हणाले. कालचा मोर्चा महायुतीच्या नेत्यांना जिव्हारी लागला आहे. काही नेते म्हणत होते की मोर्चाला लोक येणार नाहीत, पण त्यांना चपराक बसली आहे. तमाम लोक अन्याय होतो म्हणून मोर्चाला आले, असं सतेज पाटील म्हणाले.
आमचे १३ उमेदवार निवडून आले, कोर्टात बाजू मांडू
शासन नियुक्त संचालकांची नियुक्ती ही चेअरमन निवडीपुरती होती, असं सतेज पाटील म्हणाले. चार महिन्यांनंतर हे चार संचालक राहणार नाहीत, ही आतली बातमी असल्याचंही ते म्हणाले. चंद्रकांत पाटील यांनी केलेल्या टीकेला उत्तर देताना पाटील म्हणाले की, दादा असं कायम बोलत असतात. आमचे १३ उमेदवार निवडून आले आहेत आणि आमची बाजू कोर्टात मांडू, असंही पाटील म्हणाले. आपण आतापर्यंत सगळ्यांना सोबत घेऊन चालण्याचा प्रयत्न करतोय आणि आपल्याला कोणतीही महत्त्वाकांक्षा नाही, असंही त्यांनी सांगितलं. दादा मला मुख्यमंत्री व्हायचं आहे असं म्हणाले, त्यामुळे आपल्याला जरा बरं वाटलं, असंही पाटील म्हणाले.
बहुमत असताना देखील सरकारने चार संचालकांना नियुक्त केलं, असा आरोप सतेज पाटील यांनी केला. मुख्यमंत्री देवेंद्र फडणवीस यांनी मिटवून घ्या असं म्हणणं आणि धनंजय महाडिक यांनी तसं होणार नाही असं म्हणणं, हे आपल्याला गाफील ठेवायचं होतं, असं पाटील म्हणाले. कोरम या नियुक्तीला लागत नाही, असंही ते म्हणाले. केवळ गोकुळची सत्ता मिळावी म्हणून चार नागरिकांना संचालक केल्याचा आरोप पाटील यांनी केला. चार मतं वेगळी ठेवण्यात आली आहेत, असंही त्यांनी सांगितलं.
स्रोत: मूळ बातमी
Leave a Reply