राष्ट्रवादी काँग्रेसच्या दोन्ही गटांच्या संभाव्य विलीनीकरणावरून राजकीय वर्तुळात जोरदार चर्चा सुरू असतानाच शिवसेनेचे नेते आणि मंत्री संजय शिरसाट यांनी याबाबत एक वेगळेच भाकीत केले आहे. छत्रपती संभाजीनगर येथील आपल्या निवासस्थानी माध्यमांशी बोलताना त्यांनी दोन्ही गट एकत्र येण्याऐवजी त्यातून तिसराच नवा गट निर्माण होण्याची शक्यता वर्तवली आहे.
शिरसाट म्हणाले की, ज्या पक्षाच्या नेत्यांची सुरुवात एकमेकांवर हल्लाबोल करण्यापासून झाली असेल, तिथे विलीनीकरण कसे शक्य आहे? नेत्यांमध्ये सुरू असलेली शाब्दिक युद्धे पाहता दोन्ही गट एकत्र येणे दूरच राहिले, उलट वाढत्या वादामुळे पक्षात आणखी एक फूट पडून ‘तिसराच गट’ बाहेर पडण्याची दाट शक्यता असल्याचे त्यांनी सांगितले.
गोकुळ दूध संघावरूनही भाष्य
गोकुळ दूध संघाच्या न्यायालयीन वादावर बोलताना शिरसाट म्हणाले की, हा कायदेशीर पेच पुढे वाढण्याची शक्यता असल्याने आताच यावर अधिक बोलणे योग्य ठरणार नाही. दोन्ही बाजूंनी न्यायालयात आपली मते मांडली असून, जोपर्यंत हा पेच सुटत नाही, तोपर्यंत कुणाचेही पूर्ण समाधान होणार नाही, असे त्यांनी नमूद केले. महाविकास आघाडीच्या काळातही असे काही निर्णय झाले होते, अशी आठवणही त्यांनी करून दिली.
गोकुळ दूध संघ दुसऱ्या एका सहकारी संस्थेच्या दावणीला बांधला जात असल्याच्या आरोपावर त्यांनी जोरदार आक्षेप घेतला. गोकुळ हा पाच लाख शेतकऱ्यांचे श्रद्धास्थान असून महाराष्ट्राचे वैभव आहे, तो कुठेही जाणार नाही, असा चुकीचा प्रचार त्वरित थांबवावा, असे ते म्हणाले. भविष्यात असे काही घडलेच तर आपण स्वतः शेतकऱ्यांच्या पाठीशी खंबीरपणे उभे राहू, असे आश्वासनही त्यांनी दिले.
विरोधकांच्या टीकेला प्रत्युत्तर
विरोधी पक्षनेते अंबादास दानवे यांच्या टीकेला उत्तर देताना शिरसाट म्हणाले की, शेतकऱ्यांसाठी आपण नेमके काय करतो, हे पाहण्यासाठी डोळे उघडे ठेवावे लागतात. आपल्यासोबत किंवा आपल्या पदाधिकाऱ्यांसोबत मैदानात येऊन पाहिल्यानंतरच ते कळेल, असे ते म्हणाले. उद्धव ठाकरे यांच्यावर निशाणा साधताना त्यांनी आठवण करून दिली की, ‘माझ्याकडे काय आहे, मी काय देऊ शकत नाही’ अशी हतबल विधाने करणारे विरोधकांचेच प्रमुख नेते आहेत.
अजित पवार यांच्याबाबत रामदास कदम यांनी उपस्थित केलेल्या शंकेवर मात्र शिरसाट यांनी भाष्य करणे टाळले. कोकणातील राजकारणावर बोलू इच्छित नसल्याचे त्यांनी स्पष्ट केले. तर संजय राऊत आणि प्रताप सरनाईक यांच्या भेटीचे समर्थन करताना ते म्हणाले की, सणासुदीच्या काळात राजकीय कटुता बाजूला ठेवून गोडवा कायम राहिला पाहिजे. राजकीय वैमनस्य वैयक्तिक जीवनात आणणे योग्य नाही; सरनाईक भेटले यात काही गैर नाही, आपणही अनेक राजकीय विरोधकांना भेटतो, असे त्यांनी सांगितले.
स्रोत: मूळ बातमी
Leave a Reply