दुष्काळात शेतकऱ्यांना दिलासा; कर्मचाऱ्यांना पदोन्नती

जिल्ह्यातील १३ तालुक्यांमध्ये दुष्काळ जाहीर झाल्यानंतर निर्माण झालेल्या परिस्थितीवर शासन व प्रशासन आता पूर्णपणे प्रयत्नशील झाले आहे. दुष्काळाच्या संकटात शेतकऱ्यांना दिलासा देणे, कर्मचाऱ्यांना पदोन्नतीची भेट देणे आणि प्रशासकीय पारदर्शकता राखणे, अशा त्रिसूत्राने जिल्हा परिषद प्रशासनाने यंदाच्या दिवाळीत सकारात्मकतेचा नवा प्रकाश पाडला आहे.

जिल्हा परिषदेचे मुख्य कार्यकारी अधिकारी ओमकार पवार यांनी दीपावलीच्या शुभ मुहूर्तावर एक मोठा निर्णय घेतला. जिल्हा परिषदेतील आरोग्य विभागातील प्रलंबित पदोन्नतीचा प्रश्न मार्गी लावत त्यांनी अनेक कर्मचाऱ्यांना पदोन्नतीचे आणि नवीन नियुक्तीचे आदेश थेट दिवाळीच्या दिवशीच दिले. ऐन सणाच्या दिवशी हे हक्काचे ‘दीपावली गिफ्ट’ मिळाल्यामुळे कर्मचाऱ्यांमध्ये आनंदाचे वातावरण निर्माण झाले.

मोफत चारा बियाणे वाटप

शेतकऱ्यांचे पशुधन वाचवण्यासाठी जिल्हा परिषद पशुसंवर्धन विभागाने ३ कोटी रुपयांचे चारा बियाणे मोफत वाटण्याचा महत्त्वपूर्ण निर्णय घेतला आहे. या मोहिमेत कृषी विभागानेही सक्रिय सहभाग घेतला असून, शेतकऱ्यांपर्यंत तब्बल ३० हजार चारा मिनी-कीट पोहोचवण्याचे उद्दिष्ट ठेवले आहे. संभाव्य पाणीटंचाई आणि चाराटंचाईवर प्रभावी उपाययोजना करण्याच्या दृष्टीने सूक्ष्म नियोजन आखले जात आहे.

पाणीटंचाईचा आराखडा

टंचाई कृती आराखडा तयार करण्यासाठी भूजल सर्वेक्षण विभागाकडून भूजल पातळीचा अहवाल आवश्यक असतो. हा विभाग वर्षातून जानेवारी, मार्च, मे आणि सप्टेंबर अशा चार वेळा भूजल पातळी तपासतो. गेल्या सप्टेंबरमधील अहवालाच्या आधारे जिल्हा परिषदेच्या ग्रामीण पाणीपुरवठा विभागाने संभाव्य उपाययोजनांचा आराखडा तयार केला आहे. या आराखड्याला जिल्हाधिकारी कार्यालयाकडून अद्याप अंतिम मंजुरी मिळालेली नाही. मात्र, वेळेचा अपव्यय टाळण्यासाठी आणि जिल्ह्यातील संभाव्य टंचाईचा अचूक फेरआढावा घेण्यासाठी भूजल मापन विभागाला तातडीने फेर सर्वेक्षण करण्याचे आदेश देण्यात आले आहेत. या नवीन सर्वेक्षणातून टंचाईची अचूक तीव्रता स्पष्ट होईल आणि त्यानुसार भविष्यातील उपाययोजनांची अंमलबजावणी केली जाईल.

प्रशासकीय कामात केवळ संवेदनशीलताच नाही, तर पारदर्शकता आणि शिस्त राखण्यासही मुख्य कार्यकारी अधिकारी ओमकार पवार यांनी प्राधान्य दिले आहे. शिक्षण विभागातील एका अधिकाऱ्यांवरील कथित आरोपांची चौकशी करण्यासाठी प्रशासनाने उच्चस्तरीय त्रिसदस्यीय समिती गठित केली आहे. या प्रकरणाचा निपक्षपातीपणे निपटारा होईल आणि दोषींवर कडक कारवाई केली जाईल, अशी अपेक्षा व्यक्त केली जात आहे.

स्रोत: मूळ बातमी