डॉ. आंबेडकर शाळा प्रवेश दिन साताऱ्यात उत्साहात

भारतरत्न डॉ. बाबासाहेब आंबेडकर यांच्या शाळा प्रवेशाला १२५ वर्षे पूर्ण झाल्यानिमित्ताने साताऱ्यातील प्रतापसिंह हायस्कूल येथे विद्यार्थी दिवस उत्साहात आयोजित करण्यात आला होता. बार्टी आणि शिक्षण विभाग जिल्हा परिषद सातारा, तसेच सामाजिक न्याय विभाग सातारा यांच्या संयुक्त विद्यमाने हा कार्यक्रम झाला.

यावेळी जिल्हा परिषदेच्या अध्यक्षा डॉ. प्रिया शिंदे, उपाध्यक्ष राजू भोसले, शिक्षण सभापती तेजस्विनी कदम, बार्टीचे संचालक बबन जोगदंड, शिक्षणाधिकारी अनिस नायकवडी यांच्यासह जिल्हा परिषद सदस्य व इतर मान्यवर उपस्थित होते.

ग्रंथालयाचे डिजिटायझेशन व निधी

डॉ. प्रिया शिंदे यांनी सांगितले की, प्रतापसिंह हायस्कूल येथील ग्रंथालयात अनेक दुर्मिळ पुस्तके असून, त्यांचे डिजिटायझेशन करून ती जतन करण्यात येतील. शाळेच्या संवर्धनासाठी एक कोटी रुपयांच्या निधीची तरतूद करण्यात आली आहे. या शाळेत डॉ. आंबेडकर यांच्यासह अनेक महान व्यक्तींनी शिक्षण घेतले आहे. त्यांचा आदर्श विद्यार्थ्यांनी घेत शाळेसोबतच साताऱ्याचे नाव उंचावण्याचे आवाहन त्यांनी केले.

राजू भोसले यांनी सार्वजनिक बांधकाममंत्री शिवेंद्रसिंहराजे भोसले यांच्या माध्यमातून १०० कोटी रुपयांचा निधी आणण्यासाठी प्रयत्नशील असल्याचे सांगितले. यानंतर तेजस्विनी कदम यांनी मनोगत नोंदवले.

व्याख्याने व विजेत्यांचा सन्मान

कर्मवीर भाऊराव पाटील विद्यापीठाचे कुलगुरू ज्ञानेश्वर म्हस्के आणि ज्येष्ठ लेखक डॉ. डी. टी. गायकवाड यांची याठिकाणी व्याख्याने झाली. राज्यस्तरीय वक्तृत्व स्पर्धेतील विजेत्या विद्यार्थ्यांना मान्यवरांच्या हस्ते पारितोषिके देऊन गौरविण्यात आले.

स्रोत: मूळ बातमी