भोकरदन-जाफ्राबाद विधानसभा मतदारसंघातील ३६ शेत व पाणंद रस्त्यांना प्रशासकीय मंजुरी देण्यात आली आहे. या निर्णयामुळे शेतकऱ्यांना शेतमालाची वाहतूक करणे आणि शिवारात दळणवळण करणे अधिक सुलभ होणार आहे. पाणंद रस्त्यांचा प्रश्न अनेक वर्षांपासून शेतकऱ्यांसाठी अडचणीचा ठरत होता. रस्त्यांची मंजुरी मिळाल्याने आता शेतातील उत्पादन थेट बाजारपेठेपर्यंत पोहोचविणे सोपे होईल आणि वाहतुकीचा खर्च व वेळ दोन्ही वाचतील.
उर्वरित रस्त्यांची मंजुरी तातडीने करा
मुख्यमंत्री बळीराजा शेत आणि पाणंद रस्ते योजना क्षेत्रीय समितीच्या कामकाजाचा आढावा घेण्यासाठी शुक्रवारी, ता. ६ रोजी तहसील कार्यालयात बैठक घेण्यात आली. या बैठकीत आमदार संतोष दानवे यांनी मंजूर झालेल्या ३६ रस्त्यांच्या कामांना गती देण्यावर भर दिला. तसेच, उर्वरित प्रस्तावित रस्त्यांच्या मंजुरीची प्रक्रियाही तातडीने पूर्ण करण्याचे निर्देश त्यांनी अधिकाऱ्यांना दिले. शेतमाल थेट बाजारपेठेपर्यंत पोचविण्यासाठी शेतरस्ते महत्त्वाचे असल्याने उर्वरित प्रस्तावांबाबतही लगेच कार्यवाही करण्याचे त्यांनी स्पष्ट केले.
पीककर्जाबाबत बँकांना सज्जड इशारा
या बैठकीत शेतकऱ्यांच्या कर्जमाफी, कर्जपुनर्रचना आणि नवीन पीककर्ज वाटपाचाही आढावा घेण्यात आला. कागदपत्रांमधील त्रुटी किंवा तांत्रिक कारणे पुढे करून शेतकऱ्यांना बँकांचे हेलपाटे मारायला लावू नका, असा सज्जड इशारा आमदार दानवे यांनी बँक प्रशासनाला दिला. पात्र शेतकऱ्यांना कोणतीही दिरंगाई न करता पीककर्ज उपलब्ध करून देण्याच्या सूचनाही त्यांनी केल्या. बैठकीस उपविभागीय अधिकारी कार्तिक पाणीग्रही, तहसीलदार ज्ञानेश्वर काकडे, उपविभागीय पोलिस अधिकारी नितीन कटेकर, गणेश ठाले, विष्णू रोडगे, श्रीकृष्ण वेणीकर, अमोल शिंदे यांच्यासह समिती सदस्य, सर्व राष्ट्रीयीकृत व सहकारी बँकांचे वरिष्ठ शाखा व्यवस्थापक आणि संबंधित विभागांचे अधिकारी उपस्थित होते.
स्रोत: मूळ बातमी
Leave a Reply