येवला तालुक्यातील दुर्गाभवानीवाडी येथील जिल्हा परिषद प्राथमिक शाळेतील शिक्षक आणि विद्यार्थ्यांनी दुष्काळी परिस्थितीत कष्ट करणाऱ्या परप्रांतीय महिला मजुरांना दिवाळी फराळाचे वाटप केले. दिवाळीचा आनंद स्वतःपुरता न ठेवता गरजूंच्या चेहऱ्यावरही हास्य फुलावे, या भावनेतून हा उपक्रम राबवण्यात आला. विद्यार्थ्यांनी केवळ दिवाळीचा आनंद वाटला नाही, तर सामाजिक बांधिलकी आणि माणुसकीचा अनोखा आदर्शही समाजासमोर ठेवला.
खाऊच्या पैशांची बचत, समाजासाठी हातभार
विशेष म्हणजे, यासाठी विद्यार्थ्यांनी स्वतःच्या खाऊसाठी मिळणाऱ्या पैशांतून बचत करून सामाजिक कार्यासाठी हातभार लावला. स्वतःच्या आनंदासाठी खर्च होणाऱ्या पैशांची बचत करून दुसऱ्यांच्या आयुष्यात आनंद निर्माण करण्याचे संस्कार विद्यार्थ्यांमध्ये रुजले, तर शिक्षणाचे खरे सार्थक होते, असा संदेश या उपक्रमातून मिळाला. बालवयातच सामाजिक जाणीव आणि सेवाभाव जोपासणाऱ्या विद्यार्थ्यांच्या या कृतीचे सर्वत्र कौतुक होत आहे.
या उपक्रमावेळी अंदरसूल केंद्राचे केंद्रप्रमुख सोमनाथ पोतदार, शाळेच्या मुख्याध्यापिका चंद्रकला कोल्हे, शाळा व्यवस्थापन समितीचे अध्यक्ष मकरंद सोनवणे, अलकाबाई वाघचौरे, कांताबाई सोनवणे आणि उपक्रमशील शिक्षक विलास बांगर आदी उपस्थित होते.
जीवनमूल्ये रुजवण्यासाठी असे उपक्रम गरजेचे
मार्गदर्शन करताना केंद्रप्रमुख सोमनाथ पोतदार यांनी विद्यार्थ्यांमध्ये सामाजिक जाणीव, संवेदनशीलता, सहकार्य आणि सेवाभाव यांसारखी जीवनमूल्ये रुजवण्यासाठी अशा उपक्रमांची आवश्यकता असल्याचे सांगितले. तसेच फटाके न फोडता प्रदूषणमुक्त आणि पर्यावरणपूरक दिवाळी साजरी करण्याचे आवाहनही त्यांनी केले.
गटशिक्षणाधिकारी प्रवीण बांगर आणि शिक्षण विस्तार अधिकारी संजय कुसाळकर यांनी शाळेच्या व विद्यार्थ्यांच्या या अनोख्या उपक्रमाचे कौतुक केले.
स्रोत: मूळ बातमी
Leave a Reply