वाशिम जिल्ह्यातील चारही बाजार समित्यांमध्ये सोयाबीनच्या दरात मोठी वाढ झाली असून, सोयाबीनने आठ हजार रुपयांचा टप्पा ओलांडला आहे. यंदा दुष्काळी परिस्थितीमुळे उत्पादनात घट झाली असून बाजारपेठेत आवक कमी असल्याने दरवाढीला चालना मिळत असल्याचं चित्र आहे. शुक्रवारी वाशिम, कारंजा, रिसोड आणि मानोरा बाजार समित्यांमध्ये सोयाबीनला ७ हजार ८०० ते ८ हजार ५३९ रुपये प्रतिक्विंटलपर्यंत दर मिळाल्याची नोंद झाली.
दरवाढीमागची कारणं
वाशिम आणि कारंजा बाजार समित्यांमध्ये सोयाबीनचा कमाल दर ७ हजार ७८० रुपयांपर्यंत पोहोचला. तर सीड क्वालिटीच्या सोयाबीनला आठ हजार रुपयांपेक्षा अधिक दर मिळत आहे. गेल्या महिनाभरापासून सोयाबीनच्या दरात सातत्याने वाढ होत असल्याने शेतकऱ्यांनी विक्रीसाठी घाई न करण्याची भूमिका घेतली आहे. आणखी दरवाढ होण्याच्या अपेक्षेने अनेक शेतकऱ्यांनी घरातच सोयाबीनचा साठा ठेवला आहे. यंदा उत्पादन कमी झाल्याने तसेच मागील हंगामातील शिल्लक साठ्यात घट झाल्याने बाजारात दर्जेदार सोयाबीनची उपलब्धता कमी आहे.
दुसरीकडे प्रक्रिया उद्योगांकडून सोयाबीनला मागणी वाढली आहे. सोयापेंड आणि खाद्यतेलाच्या देशांतर्गत व आंतरराष्ट्रीय बाजारपेठेतील मागणीचाही दरवाढीवर परिणाम होत आहे. त्यामुळे सोयाबीन खरेदीसाठी विविध कंपन्यांकडून प्रयत्न सुरू आहेत.
हमीभावापेक्षा दोन हजारांनी अधिक दर
दरम्यान, केंद्र सरकारने २०२६-२७ हंगामासाठी सोयाबीनचा हमीभाव ५ हजार ७०८ रुपये प्रतिक्विंटल निश्चित केला आहे. मात्र खुल्या बाजारात सोयाबीनचे दर हमीभावापेक्षा दोन हजार रुपयांहून अधिक वाढले आहेत.
विठोली येथील खाजगी कृषी बाजाराचे संचालक अनिल चांडक म्हणाले की, सध्या सोयाबीन या शेतमालाला चांगला भाव मिळत असून शेतकरी हित लक्षात ठेवून बाजारात शेतकऱ्यांच्या मालाला अधिकचा दर देण्याचा प्रयत्न केला जात आहे. त्यांनी शेतकऱ्यांनी आपला शेतमाल बाजारात विक्रीसाठी आणावा, असं आवाहन केलं आहे. वाशिम बाजार समितीचे सचिव वामनराव सोळंके म्हणाले की, जिल्ह्यातील शेतकऱ्यांनी आपला शेतमाल बाजार समितीमध्येच आणावा. सध्या भाव अधिक वाढत असल्यामुळे शेतमालाला योग्य भाव मिळेल आणि मोबदलाही त्वरित मिळेल, असं त्यांनी सांगितलं.
Leave a Reply