आशिया कप रायझिंग स्टार्स २०२६ स्पर्धेत भारत ‘अ’ आणि पाकिस्तान ‘अ’ संघ रविवारी, २२ नोव्हेंबर रोजी आमनेसामने येणार आहेत. दोन्ही संघांनी स्पर्धेची दमदार सुरुवात केली आहे. शुक्रवारी, २० नोव्हेंबर रोजी झालेल्या सामन्यात भारताने नेपाळला, तर पाकिस्तानने युएईला पराभूत केले. दोन्ही संघ ‘ब’ गटात अव्वल दोन स्थानांवर आहेत. त्यामुळे रविवारच्या महामुकाबल्यात कोणता संघ बाजी मारणार, याकडे सर्वांचे लक्ष लागले आहे.
नेपाळवर ३०६ धावांनी मोठा विजय
नेपाळविरुद्ध भारताने ३०६ धावांनी मोठा विजय मिळवला होता. या सामन्यात कर्णधार तिलक वर्मा आणि कुमार कुशाग्र यांनी शतके झळकावली होती. पाकिस्तानविरुद्धही या दोघांकडून मोठ्या खेळीची अपेक्षा असेल. गोलंदाजीत हर्षित राणाने चार, तर प्रिन्स यादवने पाच विकेट्स घेतल्या होत्या. शहबाज अहमदनेही एक विकेट घेतला होता.
संभाव्य प्लेइंग ११ कशी असेल?
नेपाळविरुद्धच्या मोठ्या विजयानंतर भारत अंतिम ११ खेळाडूंमध्ये बदल करण्याची शक्यता कमी आहे. स्फोटक सलामीवीर अभिषेक शर्मा आणि वैभव सूर्यवंशी डावाची सुरुवात करू शकतात. मागील सामन्यात तिसऱ्या क्रमांकावर फलंदाजीला आलेला आयुष बडोनी मोठी खेळी करण्यात अपयशी ठरला. मात्र, त्याला आणखी एक संधी मिळू शकते. व्यवस्थापनाच्या इच्छेनुसार त्याच्या जागी प्रभसिमरन सिंगला संघात स्थान दिले जाऊ शकते. खालच्या फळीत रिंकू सिंग आणि सूर्यांश शेडगे फलंदाजीची जबाबदारी सांभाळू शकतात. हर्षित राणा आणि प्रिन्स यादव वेगवान गोलंदाजीची जबाबदारी सांभाळतील. विपराज निगमला अद्याप गोलंदाजीने योगदान देण्याची संधी मिळालेली नाही, त्यामुळे त्यालाही पाकिस्तानविरुद्ध खेळण्याची संधी मिळू शकते.
भारताची संभाव्य प्लेइंग ११ : अभिषेक शर्मा, वैभव सूर्यवंशी, तिलक वर्मा (कर्णधार), आयुष बडोनी/प्रभसिमरन सिंग, कुमार कुशाग्र (यष्टिरक्षक), रिंकू सिंग, सूर्यांश शेडगे, शहबाज अहमद, विपराज निगम, हर्षित राणा, प्रिन्स यादव.
सामना कधी आणि कुठे?
हा सामना दोहा येथील वेस्ट एंड पार्क आंतरराष्ट्रीय क्रिकेट स्टेडियमवर खेळला जाईल. भारतीय प्रमाणवेळेनुसार दुपारी ३:३० वाजता सामना सुरू होणार आहे. चाहते हा सामना सोनी स्पोर्ट्स नेटवर्कवर थेट पाहू शकतात. सोनी लिव्ह ॲप आणि संकेतस्थळावरही या सामन्याचे प्रसारण केले जाईल.
Leave a Reply