राज्यात थंडीचा जोर हळूहळू वाढत असून उत्तर महाराष्ट्रातील तापमान आठ अंशांच्या आसपास घसरले आहे. जळगाव आणि धुळे येथे किमान तापमान आठ अंशांच्या आसपास नोंदवले गेले, तर निफाडमध्ये ८.२ अंश सेल्सिअस तापमानाची नोंद झाली. नाशिकमध्ये १० अंश आणि पुण्यात ११.२ अंश सेल्सिअस तापमान नोंदवले गेले. सातारा आणि जेऊर येथे किमान तापमान १२ अंश सेल्सिअस राहिले.
सकाळी आणि रात्री नागरिकांना चांगलीच हुडहुडी भरत आहे. मध्य महाराष्ट्रातही थंड वाऱ्यांमुळे गारठा कायम आहे. दुसरीकडे विदर्भातील काही भागांत पावसाच्या हलक्या सरी कोसळल्याने हवामानात बदल जाणवत आहे.
उत्तर महाराष्ट्रात गारठा
उत्तर महाराष्ट्रात थंडीचा जोर सर्वाधिक जाणवत आहे. जळगाव जिल्ह्यात सलग दुसऱ्या दिवशी राज्यातील सर्वात कमी तापमानाची नोंद झाली. सकाळच्या वेळी धुके आणि थंड वाऱ्यांमुळे नागरिकांना उबदार कपड्यांचा आधार घ्यावा लागत आहे.
विदर्भात पावसाची शक्यता
विदर्भातील काही भागांत हलक्या पावसाच्या सरी पडत आहेत. चक्रीवादळाच्या पार्श्वभूमीवर विदर्भात पावसाची शक्यता वर्तवण्यात आली आहे. पुढील काही दिवसांत थंडीचा जोर कायम राहण्याची शक्यता आहे.
Leave a Reply