पुण्यातील विमाननगर परिसरातून चोरीची एक धक्कादायक घटना समोर आली आहे. विधानपरिषदेचे आमदार प्राजक्त तनपुरे यांच्या निवासस्थानी चोरट्यांनी हात साफ केला आहे. त्यांच्या घरातून महागडी चामड्याची बॅग, ईअरपॉड, सूट आणि लिप पेन्सिल अशा मौल्यवान वस्तू चोरीला गेल्या आहेत. चोरी झालेल्या साहित्याची एकूण किंमत ९० हजार ९१६ रुपये असल्याची माहिती समोर आली आहे.
बॅग गायब झाल्याचे पत्नीच्या लक्षात आले
प्राजक्त तनपुरे यांचे विमाननगरमधील लुंकड स्काय व्हिला सोसायटीमध्ये घर आहे. या घरातील कपाटात ठेवलेली महागडी लुई व्हिटॉन कंपनीची चामड्याची बॅग अचानक गायब झाल्याचे त्यांच्या पत्नीच्या लक्षात आले. त्यानंतर त्यांनी याबाबत घरातील मोटारचालक संग्राम तमनेर यांच्याकडे विचारणा केली. बॅग नेमकी कुठे गेली, याचा शोध घेण्यासाठी घरात काम करणाऱ्या महिलांकडेही चौकशी करण्यात आली. सर्वांनी मिळून घरात बॅग शोधण्याचा प्रयत्न केला. मात्र बॅग मिळाली नाही. त्यानंतर घरातील इतर वस्तूंची पाहणी केली असता ईअरपॉड, सूट आणि लिप पेन्सिल यांसारख्या वस्तूही गायब असल्याचे समोर आले. यामुळे घरात चोरी झाल्याचा संशय अधिक बळावला.
२२ ऑक्टोबर ते ३ नोव्हेंबरदरम्यान चोरीचा अंदाज
ही घटना २२ ऑक्टोबर ते ३ नोव्हेंबर या कालावधीत घडली असावी, असा पोलिसांचा अंदाज आहे. या प्रकरणी आमदारांच्या मोटारीवरील चालक संग्राम चंद्रभान तमनेर यांनी विमानतळ पोलीस ठाण्यात तक्रार दाखल केली आहे. त्यानुसार पोलिसांनी चोरीचा गुन्हा नोंदवला आहे. आमदारांच्या निवासस्थानीच चोरी झाल्याने या घटनेची चर्चा सुरू झाली आहे. घरातील मौल्यवान वस्तू नेमक्या कोणी चोरल्या आणि चोरी कशी झाली, याचा शोध आता पोलीस घेत आहेत. तसेच या प्रकरणात कोणाचा सहभाग आहे का, याचाही तपास केला जात आहे. पोलिसांकडून पुढील तपास सुरू असून चोरीच्या घटनेमागील सत्य लवकरच समोर येण्याची शक्यता आहे.
Leave a Reply