दिल्लीत सोमवारी एका पुस्तक प्रकाशनाच्या कार्यक्रमात काँग्रेस नेते राहुल गांधी यांनी आपल्या आई-वडिलांच्या नात्याबद्दलचा एक आठवणीतला किस्सा सांगितला. त्या किस्स्यावरून सुरू झालेला वाद आता राजकीय पातळीवर चांगलाच पेटला आहे. या वादावर राहुल गांधी यांनी सोशल मीडियावरून थेट उत्तर दिलं आहे.
सोनिया गांधी यांच्या आत्मचरित्राच्या पुस्तकाच्या प्रकाशनाच्या वेळी राहुल गांधी यांनी सांगितलं होतं की, जेवणाच्या वेळी त्यांची आई सोनिया गांधी नेहमी वडील राजीव गांधी यांच्या मांडीवर बसायच्या. लहानपणी आपल्याला ही गोष्ट अगदी सामान्य वाटायची, असं त्यांनी मिश्कील शैलीत सांगितलं होतं. मात्र त्यांच्या या विधानावरून सोशल मीडियावर वेगवेगळ्या प्रतिक्रिया उमटल्या. काहींनी त्यावर टीका केली, तर अनेकांनी आई-वडिलांमधील प्रेमाचं भरभरून कौतुक केलं.
वाद कसा पेटला?
राहुल गांधी यांच्या विधानावरून भाजप आणि भाजप समर्थकांनी त्यांच्यावर टीकेची झोड उठवली. या टीकेला उत्तर देताना राहुल गांधी यांनी सोशल मीडियावर पोस्ट लिहिली. त्यात त्यांनी म्हटलं की, भाजप आणि राष्ट्रीय स्वयंसेवक संघाच्या समर्थकांच्या मनात भीती, राग आणि द्वेषाचं जाळं तयार झालं आहे. हे जाळं त्यांना प्रेम अनुभवण्यापासून आणि ते व्यक्त करण्यापासून रोखतं, असं त्यांचं म्हणणं आहे.
राहुल गांधी नेमकं काय म्हणाले?
आपल्या पोस्टमध्ये राहुल गांधी यांनी लिहिलं की, खरा हिंदू म्हणून या लोकांना भीती, राग आणि द्वेषाच्या जाळ्यातून मुक्त करणं हे आपलं कर्तव्य आहे, जेणेकरून त्यांनाही प्रेमाने आपुलकीचा आनंद घेता येईल. पोस्टच्या शेवटी त्यांनी ‘सत्यम शिवम सुंदरम’ असंही लिहिलं आहे.
राहुल गांधी यांच्या पोस्टसोबत कर्नाटकातील हळेबीडू येथील एका शिल्पाचा फोटोही शेअर करण्यात आला होता. या शिल्पात भगवान शिव आणि माता पार्वती नंदीवर एकत्र बसलेले दिसतात. या फोटोवरून आसामचे मुख्यमंत्री हिमंता बिस्वा सरमा यांनी राहुल गांधी यांच्यावर टीका केली. कोणत्याही माणसाची तुलना देवासोबत करता येत नाही, असं त्यांनी म्हटलं आहे.
दुसरीकडे, भाजपने या पोस्टवरून राहुल गांधी यांना हळेबीडूच्या इतिहासावरून प्रश्न विचारले. हळेबीडूची जुनी राजधानी द्वारसमुद्र हे नाव कसं पडलं, तिथे झालेल्या ऐतिहासिक विध्वंसाबद्दल भाजपने दावा केला की, 1311 मध्ये अलाउद्दीन खिलजीचा सेनापती मलिक काफूर आणि 1326-27 मध्ये मोहम्मद बिन तुघलकाच्या सैन्याने हळेबीडूवर हल्ले करून मंदिरांची तोडफोड केली होती. तिथल्या खंडित मूर्तींचे चेहरे आणि हात कोणी तोडले, असा सवालही भाजपने उपस्थित केला आहे.
Leave a Reply