काँग्रेस नेते सतेज उर्फ बंटी पाटील यांच्यावर पक्षाने मोठी जबाबदारी सोपवली आहे. आगामी गोवा विधानसभा निवडणुकीसाठी स्थापन करण्यात आलेल्या छाननी समितीत त्यांना स्थान देण्यात आले आहे. या समितीच्या माध्यमातून उमेदवारांची निवड प्रक्रियेत त्यांची महत्त्वाची भूमिका असणार आहे.
गोकुळ निवडणुकीतील एकाकी लढा
नुकतीच गोकुळ दूध संघाची निवडणूक पार पडली. या निवडणुकीत सतेज पाटील यांनी महायुतीला धक्का देत सत्ता मिळवली. मात्र निवडणुकीनंतर घडलेल्या नाट्यमय घडामोडींमुळे सत्ता येऊनही अध्यक्षपद महायुतीकडे गेले. महायुतीविरोधात त्यांनी एकाकी लढा दिला आणि १३ संचालक निवडून आणले. त्यांच्याकडे १२ विरुद्ध १२ अशी विजयी आघाडी होती. मात्र सरकारने चार स्वीकृत सदस्यांची नेमणूक करत गोकुळवर सत्ता मिळवली. अध्यक्षांच्या निवडणुकीत १६ मते मिळवत राजेंद्र पाटील हे नवे चेअरमन म्हणून नियुक्त झाले. या लढ्याची गल्ली ते दिल्ली सर्वत्र चर्चा झाली.
गोवा छाननी समितीत स्थान
आगामी गोवा विधानसभा निवडणुकांसाठी अखिल भारतीय काँग्रेस कमिटीने छाननी समिती स्थापन केली आहे. राष्ट्रीय काँग्रेसचे अध्यक्ष मल्लिकार्जुन खरगे यांच्या निर्देशानुसार पक्षाचे सरचिटणीस के. सी. वेणुगोपाल यांनी याबाबतचे प्रसिद्धीपत्रक जारी केले. या समितीच्या अध्यक्षपदी के. जे. जॉर्ज यांची नियुक्ती करण्यात आली असून सतेज पाटील यांच्यासह खासदार शफी परंबिल यांनाही सदस्य म्हणून स्थान देण्यात आले आहे.
समितीचे काम काय असणार?
उमेदवारांची लोकप्रियता, संघटनात्मक ताकद तसेच निवडणुकीबाबतची तयारी याबाबत ही समिती काम करणार आहे. याच माध्यमातून उमेदवार निवडले जाणार आहेत. या निवडीबद्दल सतेज पाटील यांनी मल्लिकार्जुन खरगे, लोकसभेचे विरोधी पक्षनेते राहुल गांधी आणि के. सी. वेणुगोपाल यांचे आभार मानले आहेत. गोव्यातील कार्यकर्त्यांसह मजबूत उमेदवार उभे करून निवडणूक जिंकण्याचे त्यांनी म्हटले आहे.
Leave a Reply